“BALLSH / Grevistet, apel deputeteve gra të PS për mbështetje: Për rrogat nuk kemi ç’të negociojmë, më mirë vdesim këtu brenda nga virusi, se jashtë nga uria” plus 9 more - Gazeta Dita
“BALLSH / Grevistet, apel deputeteve gra të PS për mbështetje: Për rrogat nuk kemi ç’të negociojmë, më mirë vdesim këtu brenda nga virusi, se jashtë nga uria” plus 9 more - Gazeta Dita |
- BALLSH / Grevistet, apel deputeteve gra të PS për mbështetje: Për rrogat nuk kemi ç’të negociojmë, më mirë vdesim këtu brenda nga virusi, se jashtë nga uria
- “Ne mund të jemi gati për një mbyllje të dytë sepse nuk ka asnjë mënyrë tjetër për të ngadalësuar virusin”, Gjermania në alarm nga rritja e rasteve me COVID-19
- Procedohet penalisht 20-vjeçari, arrestohen edhe 6 persona të tjerë për vepra të ndryshme penale
- Hagës i mbaron afati prej gjashtë muajsh i shqyrtimit të aktakuzës për Thaçin, çfarë do ndodh me presidentin?
- COVID-19/ Presidenti i Polonisë rezulton pozitiv me koronavirus, ja gjendja e tij shëndetësore
- Zjarri në servisin në Elbasan/ Merr flakë magazina, digjen dy makina të parkuara
- Gjermania regjistron 10,000 viktima që nga fillimi i pandemisë
- COVID-19/ Dy kompani farmaceutike rifillojnë testimin e vaksinës
- Përballja presidenciale Trump-Biden, shtetet amerikane që mund të përcaktojnë rezultatin e zgjedhjeve 2020
- Njihuni me parashikimin e motit për ditën e shtunë, 24 tetor 2020
Posted: 24 Oct 2020 01:43 AM PDT Në ditën e dhjetë të protestës, gratë e grevës së urisë në Ballsh nuk tërhiqen, madje kanë paralajmëruar përshkallëzimin e mëtejshëm, duke thënë se po i detyrojnë që të fusin aty edhe fëmijët e tyre. Ato nuk e pranojnë sjelljen e kryeministrit dhe qëndrimin e tij për të dalë nga greva e më pas të bisedojnë. Disa e quajnë atë presion dhe të tjerat, teatër. “Rifillimi i punës është një kusht i negociueshëm, por nuk ka pse të negociojmë për lekët tona. Për çfarë të negociojmë? Ne s’po i kërkojmë kryeministrit diçka që është jashtë detyrës së tij. Kërkojmë të zbatohet një vendim gjyqi dhe të na jepen rrogat, kërkojmë bukën e fëmijëve tanë. Kryeministri bën teatër sepse ka pasur kohën e mjaftueshme për të biseduar me ne, që nga janari që kemi nisur protestën. Por nuk donin, na dhunuan me polici, tani këta duan të na çnderojnë si njerëz. Më mirë të vdesim këtu brenda nga korona se të dalim jashtë e të vdesim për bukë. Është turp, është turp. Do na vijnë edhe fëmijët në mbështetje”, tha sot për mediat një nga grevistet. Ato u bëjnë apel edhe grave socialiste të parlamentit për mbështetje. h.b/dita |
Posted: 24 Oct 2020 01:24 AM PDT Për të dytën ditë me radhë në Gjermani raportohen 11.000 raste të reja infektimesh nga koronavirusi. Një mjek i ekipit drejtues paralajmëroi se 20.000 infektime në ditë mund të nënkuptojnë një tjetër mbyllje, raporton DW. Të premten (23.10) Gjermania raportoi 11.242 raste të reja infektimesh, duke shënuar ditën e dytë rresht me më shumë se 11.000 infektime të reja ditore. Që nga nisja e pandemisë, kjo është java e parë që numëron mbi 10.000 raste të reja brenda 24 orëve. Gjatë 7 ditëve të shkuara, shkalla e infeksionit në të gjithë vendin është rritur në 60.3 raste për 100.000 persona, krahasuar me 56.2 për 100.000 persona të një dite më parë. Numri i të vdekurve u rrit me 49 në 9954, shkruan DW. A është e nevojshme një mbyllje e dytë? Duke parë shifrat në rritje, një ekspert mjekësor i ekipit drejtues tha, se mund të jetë e nevojshme një mbyllje e dytë, në rast se do të kalohet numri i 20.000 infektimeve të reja ditore. "Atëherë nuk do të ishte më e mundur për autoritetet shëndetësore që të gjurmojnë dhe të ndërpresin zinxhirët e infeksionit," i tha të përditshmes 'Rheinische Post' Frank Ulrich Montgomery, kryetari i Shoqatës Botërore të Mjekësisë. "Atëherë ne mund të jemi gati për një mbyllje të dytë sepse nuk ka asnjë mënyrë tjetër për të ngadalësuar virusin." Montgomery gjithashtu i tha gazetës, se çdo vaksinë e mundshme kundër koronavirusit nuk do të ishte një "ilaç" dhe se vaksinimi i të gjithë popullsisë mund të zgjasë "dy deri në tre vjet". Infektohet bashkëshorti i ministrit Burri i ministrit të Shëndetësisë Jens Spahn është bashkuar ndërkohë në radhët e të infektuarve, pasi vetë Spahn rezultoi pozitiv të mërkurën (21.10). Një zëdhënës i Ministrisë së Shëndetësisë tha të premten se Daniel Funke ishte izoluar me burrin e tij të mërkurën dhe ishte testuar një ditë më pas. Ai tha se Spahn vazhdon të ketë simptoma të lehta ftohjeje, ndërsa Funke aktualisht nuk po shfaq simptoma. Spahn është anëtari i parë i kabinetit qeveritar gjerman që është infektuar nga koronavirusi. Ministri i Jashtëm Heiko Maas dhe Kancelarja Angela Merkel kaluan të dy nëpër periudha të shkurtra izolimi paraprak, por asnjëherë nuk rezultuan pozitivë. Ndihma e qeverisë vijon Ndërsa pandemia vazhdon të shkaktojë kërdi ekonomike, qeveria gjermane është zotuar të vijojë me ndihmat financiare për biznesin deri në 2021. Ministri i Ekonomisë Peter Altmaier premtoi, se ndihma për industrinë e turizmit të goditur rëndë do të vazhdojë brenda rregullave të Komisionit Evropian. "Aktualisht, ne jemi duke përgatitur një rifreskim të ndihmës sonë financiare, të cilën do ta zgjasim deri vitin e ardhshëm," tha ai. Qeveria ka zgjatur gjithashtu skemën e saj të subvencionimit të pagave "me kohë të shkurtuar pune" deri në fund të 2021, që do të thotë se do të vazhdojë me zgjedhjet e planifikuara kombëtare të vitit të ardhshëm. Skema lejon ndërmarrjet në gjendje të vështirë të ulin orët e punës së punonjësve dhe t'i paguajnë ata në vend që t'i pushojnë nga puna dhe qeveria mbulon pjesërisht pagat e ulura. Rriten shtrimet në spitale Autoritetet thonë se rritja e rasteve reflektohet në numrin e shtrimeve në spital në landin më të populluar të Gjermanisë, Renanisë Veriore – Vestfalisë (NRW). Sipas qeverisë së NRW, rreth 1420 pacientë me koronavirus janë aktualisht të shtruar në spital, krahasuar me 320 një muaj më parë. Nga këta pacientë, 275 janë në kujdes intensiv dhe 148 të intubuar. Sidoqoftë, qeveria tha që spitalet ishin larg arritjes së kapacitetit të tyre, me 1320 vende të kujdesit intensiv akoma të disponueshëm, nga një total prej 5640. h.b/dita |
Procedohet penalisht 20-vjeçari, arrestohen edhe 6 persona të tjerë për vepra të ndryshme penale Posted: 24 Oct 2020 01:06 AM PDT Policia e Elbasanit ka arrestuar gjashtë persona për vepra të ndryshme penale dhe një 20-vjeçar, banues në fshatin Dardhë, Librazhd, u procedua penalisht në gjendje të lirë për veprën penale "Moskallëzim krimi". Në të gjithë qarkun Elbasan, policia ka vijuar kontrollet në zbatim të planit të masave për evidentimin e ndëshkimin ligjor të veprimtarisë së kundërligjshme të lojërave të fatit. “Arrestohen në flagrancë shtetasit R.N., 29 vjeç, ( pronari i lokalit i cili e kishte marrë me qera) dhe Xh.B., 21 vjeç( kamarier) banues në Gramsh, për veprat penale "Organizimi i lotarive të palejuara", dhe "Fshehja e të ardhurave". Arrestimi i tyre u bë pasi, në lagjen "18 Gushti", Gramsh, në subjektin e "Bar-Kafe", iu gjet dhe u sekuestrua në cilësinë e provës materiale dy aparat celular me faqe sportive të hapura, ku ishin të vendosura biletat me ndeshje, një kompjuter dhe një monitor. Specialistët për Hetimin e Krimit në Komisariatin e Policisë Librazhd, arrestuan në flagrancë për veprën penale "Plagosje e rëndë me dashje" e kryer në bashkëpunim, shtetasit M.Ç., 21 vjeç, dhe D.Ķ., 23 vjeç, banues të dy në fshatin Kokrevë, Librazhd. Arrestim i tyre u bë pasi këta shtetas në bashkëpunim me njëri- tjetrin, në fshatin Hotolisht, Librazhd, pas një konfliktit të çastit për motive të dobëta kanë goditur me mjet të mprehtë thikë shtetasin F.D., 23 vjeç, i cili është jashtë rrezikut për jetën. Si dhe u procedua penalisht në gjendje të lirë për veprën penale "Moskallzim krimi", shtetasin K.K., 20 vjeç, banues në fshatin Dardhë, Librazhd. Specialistët për Hetimin e Krimit në Komisariatin e Policisë Elbasan, arrestuan në flagrancë shtetasin: L.M., 30 vjeç, banues në fshatin Shushicë, Elbasan, pasi ka ushtruar dhunë fizike dhe psikologjike ndaj bashkëshortes së tij. Nga specialistët e Qarkullimit Rrugor në Drejtorinë Vendore të Policisë Elbasan, arrestuan në flagrancë shtetasin: B.Sh., 36 vjeç, banues në Tiranë, pasi është kapur nga shërbimet e Policisë Rrugore duke drejtuar motoçikletën në gjëndje të dehur.” – thuhet në njoftimin e Policisë. h.b/dita |
Posted: 24 Oct 2020 12:46 AM PDT Dhomat e Specializuara në Hagë nuk e kanë njoftuar ende publikun nëse aktakuza për krime lufte dhe krime kundër njerëzimit, ndaj presidentit të Kosovës, Hashim Thaçi, është konfirmuar apo hedhur poshtë, ndërkohë që afati prej gjashtë muajsh për ta bërë këtë, përfundon të shtunën, në 24 tetor. Megjithatë, sipas Rregullores së Procedurës dhe Provave të këtyre Dhomave, një gjyqtar, në rrethana të jashtëzakonshme – nëse një prokuror i specializuar paraqet arsye të vlefshme përpara se të konfirmohet aktakuza – mund të lëshojë urdhër të përkohshëm për moszbulimin e aktakuzës para publikut, "për të parandaluar arratisjen e të akuzuarit, ose për të parandaluar ndonjë ndërhyrje tjetër në procedurë, ose trazirat shoqërore". "Në çdo rast, aktakuza do t'i zbulohet publikut, me ndryshime të mundshme nëse është e nevojshme, jo më vonë se paraqitja e parë e të akuzuarit përpara gjykatës", thuhet në pikën 88 të kësaj Rregulloreje. Prokuroria e Specializuar në Hagë e paraqiti në 24 prill aktakuzën për shqyrtim në Dhomat e Specializuara të Kosovës kundër Thaçit, kryetarit të Partisë Demokratike të Kosovës, Kadri Veseli, si dhe disa personave "të tjerë", emrat e të cilëve prokuroria nuk ka dashur t'i publikojë./RTK/ h.b/dita |
COVID-19/ Presidenti i Polonisë rezulton pozitiv me koronavirus, ja gjendja e tij shëndetësore Posted: 24 Oct 2020 12:28 AM PDT Presidenti i Polonisë, Andrzej Duda pas kryerjes së testit, ka rezultuar pozitiv me COVID-19. Sakaq, ministri Blazej Spychalski njoftoi se gjendja shëndetësore e Presidentit është e qëndrueshme deri tani. Kujtojmë se ndërkohë Polonia është duke u përballur me rritje të rasteve të reja të cilat shënuan rekord të premten duke kapur shifrat 13, 600 të infektuar, ndërsa 153 pacientë humbën jetën. "Ai dje u testua për COVID-19. Rezultati doli pozitiv. Presidenti është në gjendje të mirë shëndetësore dhe ne jemi në kontakt të vazhdueshëm me stafin mjekësor", shkruan ai në "Twitter". h.b/dita |
Zjarri në servisin në Elbasan/ Merr flakë magazina, digjen dy makina të parkuara Posted: 24 Oct 2020 12:09 AM PDT Policia e Elbasanit ka dhënë informacion zyrtar në lidhje me zjarrin që ndodhi sot në një servis makinash. Ngjarja ndodhi rreth orës 7 në aksin rrugor Elbasan- Metarlugji, në fshatin Katundi i Ri. Burime zyrtare thanë se zjarri ka rënë zjarr në një pikë servisi në pronësi të shtetasit Klodian B, banues në Elbasan. Si pasojë e flakëve të zjarrit po digjet një magazinë me pjesë këmbimi si dhe dy mjete të cilat kanë qenë të parkuara brenda ambienteve të këtij servisi. Mësohet se dëme në njerëz nuk ka. “Më datë 24.10.2020, rret orës 07:50, në aksin rrugor Elbasan- Metarlugji , në fshatin Katundi i Ri, ka rënë zjarr në një pikë servisi në pronësi të shtetasit K.B., banues në Elbasan. Si pasojë e flakëve të zjarrit është djegur një magazinë me pjesë këmbimi si dhe dy mjete të cilat kanë qenë të parkuara brenda ambienteve të këtij servisi. Dëme në njerëz nuk ka. Menjëherë në vendngjarje kanë shkuar forcat e Policisë dhe të Zjarrëfikses dhe po punohet për fikjen e zjarrit. Grupi hetimor ndodhet në vendngjarje dhe vijon punën për zbardhjen dhe sqarimin e rrethanave të ngjarjes”, njofton policia. h.b/dita |
Gjermania regjistron 10,000 viktima që nga fillimi i pandemisë Posted: 23 Oct 2020 11:56 PM PDT Gjermani ka raportuar 14, 714 raste me koronavirus gjatë 24 orëve. Autoritetet shëndetësore bëjnë me dije se 49 pacientë kanë humbur jetën. Ndërkohë që nga fillimi i pandemisë deri më tani janë konfirmuar 418, 005 raste me koronavirus, ndërsa 10,003 pacientë kanë humbur jetën. h.b/dita |
COVID-19/ Dy kompani farmaceutike rifillojnë testimin e vaksinës Posted: 23 Oct 2020 11:39 PM PDT Dy kompani prodhuese barnash njoftuan të premten rifillimin e testimit në Shtetet e Bashkuara të vaksinave të tyre për COVID-19. Testimi i vaksinës së kompanisë AstraZeneca ishte ndërprerë që nga fillimi i shtatorit, ndërsa studimi i vaksinës Johnson & Johnson u ndalua në fillim të javës së kaluar. Çdo kompani pati një nga vullnetarët e studimit të saj që shfaqi probleme serioze shëndetësore, zhvillim ky që kërkon një rishikim të të dhënave të sigurisë, shkruan VOA. Të dy vaksinat e koronavirusit janë ndër disa vaksina kandidate në fazën përfundimtare të testimit, hapi i fundit ky para se të kërkohet miratimi i agjencive rregullatore. Kompanitë farmaceutike thanë se morën miratimin të premten nga Administrata e Ushqimit dhe Barnave për të rifilluar testet në Shtetet e Bashkuara. Ndalime të tilla të përkohshme të testimit të ilaçeve dhe vaksinave janë relativisht të zakonshme. Në hulumtimet që përfshijnë mijëra pjesëmarrës, disa ka të ngjarë të sëmuren. Ndërprerja e një studimi i lejon studiuesit të hetojnë nëse sëmundja është një efekt anësor apo një rastësi. Testimi i vaksinës AstraZeneca, i zhvilluar në bashkëpunim me Universitetin e Oksfordit, tashmë ka rifilluar në Mbretërinë e Bashkuar, Brazilin, Afrikën e Jugut dhe Japoni. “Rinisja e provave klinike në të gjithë botën është një lajm i shkëlqyer pasi na lejon të vazhdojmë përpjekjet tona për të zhvilluar këtë vaksinë që do të ndihmojë në mposhtjen e kësaj pandemie të tmerrshme”, tha në një deklaratë Pascal Soriot, drejtor ekzekutiv i kompanisë AstraZeneca. Studimi i kompanisë AstraZeneca përfshin 30,000 njerëz në Shtetet e Bashkuara. Disave prej tyre u injektohet vërtet vaksina dhe të tjerëve jo. Testimi u ndërpre pasi një pjesëmarrës britanik zhvilloi simptoma të rënda neurologjike në përputhje me një inflamacion të rrallë të palcës kurrizore të quajtur mielit transvers. Testimi i AstraZenecas ishte ndalur gjithashtu në fillim të verës, raporton VOA. Johnson & Johnson thanë se po përgatitet të rifillojë rekrutimin së shpejti të vullnetarëve për studimin e saj të vaksinave në Shtetet e Bashkuara. Në një deklaratë, kompania nuk zbuloi natyrën e sëmundjes së vullnetarit të saj, por tha se një vlerësim i plotë “nuk gjeti prova se shkaku ishte vaksina”. Kompania shtoi se është duke zhvilluar bisedime me institucionet e tjera rregullatore nëpër botë, për të rifilluar testimin në vendet e tyre. h.b/dita |
Posted: 23 Oct 2020 11:21 PM PDT Ndërsa kanë mbetur vetëm disa ditë para zgjedhjeve të 3 nëntorit, presidenti republikan Donald Trump dhe kandidati demokrat Joe Biden po bëjnë fushatë intensivisht në shtetet "fushëbetejë" ose "të lëkundura", ku po bëhet lufta më e ashpër politike, shkruan VOA. Këto shtete janë të rëndësishme në zgjedhjet presidenciale amerikane, ku fituesi nuk përcaktohet nga vota popullore, por secili shtet ka një numër të caktuar votash elektorale, të cilat i jepen njërit prej kandidatëve ose tjetrit në varësi të rezultatit të votës popullore në atë shtet. Në të gjitha shtetet, me përjashtim të Meinit dhe Nebraskës, kandidati që merr votat më të shumta popoullore në një shtet fiton të gjitha votat elektorale të atij shteti. Ky sistem zgjedhor sipas të cilit "fituesi merr gjithçka" i nxit kandidatët të bëjnë fushatë më intensive në shtetet konkurruese ku fitorja mund të nënkuptojë shanse më të shumta drejt Shtëpisë së Bardhë. Shtetet e kontestuara ngushtë që mund të "priren" drejt secilës parti, të tilla si Pensilvania, marrin më shumë vëmendje nga kandidatët sesa shtetet e tjera, të tilla si Kalifornia, ku njëra parti është pothuajse e sigurt që do të marrë shumicën e votave. Shtetet e lëkundura në zgjedhjet e vitit 2020 Presidenti Trump fitoi në këto gjashtë shtete në 2016 me një diferencë fare të ngushtë, në disa raste më pak se një përqind, por sondazhet aktualisht tregojnë një epërsi të vogël për zotin Biden në të gjashta këto shtete. Diferenca më e vogël në shtetet e lëkundura sesa në shkallë kombëtare Pavarësisht nga prirjet që tregojnë se zoti Biden mund të jetë në gjendje të tërheqë një pjesë të këtyre grupeve demografike në vitin 2020, fushata e tij ka paralajmëruar mbështetësit të mos bien në vetëkënaqësi. "Realiteti është se kjo garë është shumë më e ngushtë sesa ç'sugjerojnë disa ekspertë në Twitter dhe në ekranet e televizioneve", shkruante menaxherja e fushatës së ish-nënpresidentit Biden, Jen O'Malley Dillon në një email për mbështetësit të shtunën. "Në shtetet kryesore të betejës politike ku do të vendoset fati i këtyre zgjedhjeve, ne mbetemi shumë afër me Donald Trump-in". Analistët thonë se ndërsa zoti Biden ka gëzuar një epërsi të qëndrueshme në sondazhe për muaj me radhë, frika kryesore e fushatës së tij tani është se ai mund të fitojë votën popullore, por të humbasë votën e kolegjit elektoral – siç ndodhi me kandidaten demokrate Hillary Clinton në 2016. Ja ç'po ndodh në shtetet që të dy fushatat i shohin si kritike për të fituar presidencën e vitit 2020. Uiskonsi Zoti Trump dhe zoti Biden e vizituan Kenoshën me mesazhe të ndryshme. Zoti Biden u përqëndrua tek lufta ndaj racizmit sistematik, ndërsa presidenti theksoi mesazhin e tij për rendin dhe ligjin. Miçigani Fushata e zotit Trump po përpiqet të bëjë për vete banorët e këtij shteti, që e shohin axhendën demokrate për mjedisin si të dëmshme për punëtorët që varen nga një bazë e fortë prodhuese. Demokrati Biden po thekson mesazhin se zoti Trump nuk ka "në plan të vërë nën kontroll virusin, as strategji për nxjerrjen e ekonomisë sonë nga ky recesion". Zoti Biden ka premtuar të investojë në vendet e punës dhe infrastrukturën kritike për shtetin, raporton VOA. Pensilvania Pensilvania në vitin 2020 shihet si më e rëndësishme për Presidentin Trump. Mund të jetë shteti që do t'i japë Joe Bidenit aq vota elektorale sa të sigurojë numrin e nevojshëm prej 270, tha Robert Griffin, drejtor kërkimesh për Grupin e Studimit të Votuesve të Fondit të Demokracisë. "Por mund të mos jetë aq e rëndësishme nëse Pensilvania shkon në një drejtim tjetër, duke pasur parasysh se Joe Biden gjithashtu duket të jetë përpara në shtete si Florida dhe Arizona," tha ai. Florida Presidenti Trump e ka drejtuar vëmendjen shpesh tek Florida gjatë gjithë fushatës së tij, duke vizituar shpesh vendpushimin e tij Mar-a-Lago dhe duke rritur regjistrimin e votuesve në shtet si pjesë e një strategjie për t'i bindur amerikanët e bardhë të klasës punëtore që nuk kishin votuar më parë. "Nëse Joe Biden fiton Floridën, do të jetë shumë e vështirë për Donald Trump-in të mbledhë 270 votat e kolegjit elektoral të nevojshme për të fituar," tha anketuesi republikan Whit Ayres i "North Star Opinion Research". Nëse zoti Trump fiton Floridën, tha Ayres, Biden ka ende mënyra të tjera, megjithëse jo aq të sigurta, për të fituar 270 vota elektorale. Karolina e Veriut "Është e vështirë të imagjinohet një rrugë për në Shtëpinë e Bardhë për Donald Trumpin në veçanti, pa siguruar Karolinën e Veriut," thotë Chris Cooper, një profesor i shkencave politike në Universitetin e Karolinës Perëndimore. "Jugu ka qenë një bastion i Partisë Republikane për më shumë se një dekadë dhe, nëse zoti Trump humbet Karolinën e Veriut, shanset janë më të mëdha që ai të humbë edhe Floridën", shtoi Cooper, përcjellë VOA. Arizona Shteti aktualisht është i prirur drejt Biden-it, një prirje e nxitur nga rritja e elektoratit demokrat mes votuesve periferikë dhe elektoratit gjithnjë e më të larmishëm të shtetit, veçanërisht numri që po rritet me shpejtësi i votuesve Hispanikë. Ata përbënin afërsisht një ndër pesë votues të Arizonës në 2016, dhe Clinton i fitoi ata me lehtësi në 2016. Të moshuarit do të luajnë një rol të madh në rezultatin e zgjedhjeve këtë vit. Në këtë shtet ka shumë komunitete pensionistësh dhe votuesit e tij janë mesatarist më të moshuar se pjesa tjetër e vendit. h.b/dita |
Njihuni me parashikimin e motit për ditën e shtunë, 24 tetor 2020 Posted: 23 Oct 2020 11:09 PM PDT Mot i kthjellët do të mbizotëroj edhe për ditën e sotme. Mjegulla e dendur do të jetë prezente deri në orët e para të ditës kryesisht përgjatë luginave. Era do të fryjë me drejtim Verilindje – Veriperëndim 1-5m/s, në bregdet deri 8m/sek. Valëzimi në dete parashikohet i forcës 1 ballë. h.b/dita |
You are subscribed to email updates from Gazeta Dita. To stop receiving these emails, you may unsubscribe now. | Email delivery powered by Google |
Google, 1600 Amphitheatre Parkway, Mountain View, CA 94043, United States |
Lexo edhe: