“Cilët janë? Profilet e dy studentëve në protestën që gjunjëzoi qeverinë” plus 9 more - Gazeta Dita

---

• Cilët janë? Profilet e dy studentëve në protestën që gjunjëzoi qeverinë
• Incident në protestë, studentët largojnë pedagogun e lëvizjes “Për Universitetin”
• Çfarë po ndodh në Europë? Protestat infektojnë edhe Brukselin
• Ditari i panjohur i Qerim Panaritit për Fan Nolin
• Studentët: Ja 8 kërkesat tona për MAS, do presim deri të martën
• “Dhjetori ’90, një skenar. Kaluam nga dollomatë te kostumet Armani”
• E keni parë varkën lodër te Parku i Liqenit? Shikoni sa bukur duket këndi i ri i lojërave
• Nga protesta në ‘leksionet’ e partisë. Basha dërgon militantët te studentët (Foto)
• Ferit Keta, kampion bote në kikboks
• “Protestoni fuqishëm, por mos lejoni t’ju mashtrojnë politikisht”

Cilët janë? Profilet e dy studentëve në protestën që gjunjëzoi qeverinë Posted: 09 Dec 2018 02:31 AM PST Një student i Shkencave Politike, që i financon studimet në Tiranë me punën si hekurlidhës në Kaçanik të Kosovës dhe shoku i tij nga Jugu, që e përballon jetesën e kushtueshme si student me punën sezonale në turizëm bashkohen në protestën kundër kostove të kripura të arsimit të lartë në Shqipëri. Nga Gjergj Erebara* Gjatë verës së kaluar, pasi mbylli vitin akademik si student i Shkencave Politike në Universitetin e Tiranës, Edison Lika, 20 vjeç, udhëtoi nga Shqipëria për në Kaçanik të Kosovës, ku kompania amerikane Bechtel po ndërton për llogari të Qeverisë së Kosovës një autostradë me vlerë qindramilionë euro që lidh Prishtinën me kufirin maqedonas. Sipas Likës, Bechtel kishte punësuar një nënkontraktor, i cili kishte punësuar një nënkontraktor të dytë dhe te ky i fundit, studenti i Shkencave Politike gjeti punë si hekurlidhës. "Punonim nga mëngjesi deri në orën 6 të mbrëmjes dhe kishim një të dielë pushim në çdo dy javë," tregoi Lika për BIRN, ndërsa disa qindra studentë po protestonin para Ministrisë së Arsimit në Tiranë tëenjten, në ditën e tretë rradhazi. Paratë e fituara si hekurlidhës në Kaçanik i nevojiteshin Edisonit për të paguar tarifën e studimit, aktualisht 40 mijë lekë në vit, si dhe kostot e tjera të lidhura me arsimin. Pasi të mbarojë studimet e nivelit të parë, atij do t'i duhet të paguajë rreth 80 mijë lekë në vit për studime master. Familja e Likës ka pak mundësi ekonomike për shkak se i ati ka qenë minator në Kalimash dhe ka dalë në pension të parakohshëm një vit para se Lika të lindte- kur industria minerare shqiptare falimentoi dhe u mbyll. "Punoj në fundjavë shitës në një dyqan dhe fitoj 2 mijë lekë për dy ditë," shtoi ai. Shoku i tij, një student nga bregu i Jugut i cili kërkoi të mos citohej me emër për shkak se i ati punon në administratë publike dhe ka frikë se mund t'i pushohet nga puna tha se gjatë verës punonte në turizëm dhe arrinte të siguronte 80 mijë lekë në dy muaj punë për t'i mundësuar vetes jetesën e kushtueshme në Tiranë. "Unë kam punuar që kur isha 13 vjeç. Nuk kam bërë asnjë ditë pushim gjatë sezonit që atëherë," tha ai. Kostoja e arsimit të lartë është rritur shumëfish gjatë viteve të fundit në Shqipëri si pjesë e përpjekjeve të qeverisë dhe universiteteve për të komercializuar arsimin e lartë. Krahasimisht me rritjen e kostos së arsimit dhe të jetesës, shqiptarët kanë parë pak ose aspak rritje pagash për më shumë se një dekadë. Studentët kanë protestuar herë pas here përgjatë katër viteve të fundit kundër tarifave më të larta universitare, kundër një reforme të qeverisë që synon të japë para për studime akademike edhe për universitetet private, (një pjesë e ligjit të reformës në arsimin e lartë që nuk është zbatuar ende), si dhe për rritjen e cilësisë së arsimit. Dy studente goditën me vezë kryeministrin Edi Rama më 2 nëntor 2015 ndërsa një studente hodhi bojë mbi ministren e Arsimit Lindida Nikolla më 17 nëntor 2016. Të dy studentët me të cilët foli BIRN të Enjten thanë se ishin angazhuar në Lëvizjen për Universitetin që në vitin e parë të studimit dhe e shihnin këtë lëvizje si shpresa e vetme kundër prirjes për komercializim të mëtejshëm të universiteteve. Protesta e fundit nisi kur studentëve të fakultetit të Arkitekturës dhe Urbanistikës në Universitetin Politeknik të Tiranës, iu kërkua të paguajnë paradhënie tarifat vjetore të shkollimit brenda dhjetorit të këtij viti. Studentët dolën në protestë duke kërkuar së paku ndarjen e pagesës në dy këste dhe shtyrjen e afatit të pagesës për më vonë. "Të paktën të kemi kohë që të mbledhin lekët," tha njëri prej tyre. Studentët e Arkitekturës bojkotuan mësimin ditën e martë, por shpejt atyre iu bashkuan studentë nga fakultete të tjera. Protesta u zgjerua më tej të enjten kur studentë në Korçë, Elbasan, Vlorë e Shkodër dolën gjithashtu në protesta. Kërkesa e studentëve të arkitekturës u zgjerua me kërkesën për anulimin e një vendimi qeverie të majit të këtij viti, i cili i ngarkon studentët me tarifë shtesë në rast se përsërisin provimet, pavarësisht nëse janë ngelës apo duan përmirësim note, si dhe me kërkesën për ulje të tarifave aktuale të shkollimit. Kryeministri Edi Rama, ndërsa u tall ditën e parë me studentët duke i quajtur ata ngelës, duket se ndryshoi mendim ditën e enjte, kur me urgjencë dhe jashtë rradhe, vendosi shfuqizimin e vendimit që kishte marrë duke anuluar tarifat shtesë. Tarifat shtesë parashikonin pagesën e afro 670 lekëve për kredit për studetët e nivelit të parë dhe rreth 750 lekë për studentët e nivelit të dytë. Çdo lëndë ka 3 deri në gjashtë kredite. Ministrja e Arsimit, Lindita Nikolla deklaroi pas vendimit: "Faleminderit studentëve që shërbyen si nxitës për të rritur komunikimin. Qeveria do të heqë dorë nga tarifimi i provimeve të bartura". Studentët që protestuan me thirrje dhe pankarta mbi gjashtë orë paraditen e së enjtes, duket se nuk u mjaftuan me anulimin e vendimit. Ata premtuan se do të vijojnë protestat. Aktivistja Liri Kuçi nga Lëvizja për Universitetin deklaroi para studentëve në fund të protestës së të enjtes: "Ngelësit e vërtetë janë ata. Ata sepse janë pak dhe janë bërë të pasur në kurrizin tonë e të prindërve tanë që nëpërkëmben çdo ditë nga pronarët për 200 mijë lekë rrogë. Janë ata sepse duan të na vjedhin me koncesione, tarifa, taksa, dhe po shpikin lloj-lloj formash për të na zhvatur akoma më shumë duke e bërë edhe më të vështirë shkollimin tonë". Studentët protestues njoftuan se do të mblidhen sërish nesër para Ministrisë së Arsimit. "Rritja e tarifave në arsim nuk ka sjellë ndonjë përmirësim në cilësinë e arsimit," mendon studenti nga bregu i Jugut. "Në bibliotekën e shkollës nuk gjenden librat që ne na rekomandohen për të lexuar në studimet tona. Librat e shkollës janë të përkthyer keq dhe shpesh janë të pakuptueshëm. Vetëm studentët që dinë të lexojnë në ndonjë gjuhë të huaj kanë mundësi të kuptojnë," shtoi ai. Pyetur se çfarë i bindi të bëhen aktivistë, studentët thanë: "Lëvizja për Universitetin është e vetmja pengesë për rritjen e mëtejshme të tarifave." ***** *Gjergj Erebara është gazetar për BIRN në Tiranë

Incident në protestë, studentët largojnë pedagogun e lëvizjes “Për Universitetin” Posted: 09 Dec 2018 02:27 AM PST Tensionohet situata te protesta e studentëve para Ministrisë së Arsimit dhe Sportit. Në një moment pedagogu Jani Marka nuk është lejuar që të flasë nga studentët, pasi e kanë akuzuar si pjesë e lëvizjes 'Për Universitetin'. vijon…

Çfarë po ndodh në Europë? Protestat infektojnë edhe Brukselin Posted: 09 Dec 2018 02:19 AM PST Protestat e dhunshme që kanë goditur Parisin javët e fundit duket se janë përhapur edhe në Brukselin fqinj, atje ku më shumë se 400 njerëz janë arrestuar pas përplasjeve mes policisë dhe "jelekverdhëve" belgë. Të paktën 1.000 policë ishin dislokuar për mbarëvajtjen e protestave në rrugë, por atyre iu desh të përdornin gazin lotsjellës dhe pompat e ujit ndaj protestuesve, pas përpjekjeve të dështuara për të mbajtur situatën nën kontroll. Zonat ku gjenden godinat e Komisionit Europian dhe Parlamentit Europian u rrethuan nga një prani e shtuar policore, ndërsa pamjet filmike që përfunduan në rrjetet sociale treguan se protestuesit u përleshën me policinë jashtë PE-së. Policia kishte vendosur barrikada në të gjitha institucionet europiane të rëndësisë kyçe, ndërsa u ndalua si masë paraprake edhe kalimi i këmbësorëve apo i automjeteve. Policia e Brukselit njoftoi se demonstruesit ishin mbledhur në dy zona kryesore të kryeqytetit belg, "Arts Lois" dhe "Porte de Namur". Zëdhënësja e policisë tha se "të paktën 70 persona ishin arrestuar pas kontrolleve të ushtruara për të parandaluar dhunën". Një agjenci belge lajmesh raportoi gjithashtu se protestues të rinj bllokuan një autostradë që lidhte Brukselin me Rekkemin në Flanders, rajoni që ndodhet pranë kufirit me Francën. Lëvizja në Belgjikë, e frymëzuar nga protestat në Francë përgjatë muajit të kaluar, u dha zë ankesave të protestuesve mbi kostot e jetesës, që kërkuan gjithashtu largimin e koalicionit qeveritar të qendrës së djathtë në Belgjikë, vetëm 6 muaj përpara mbajtjes së zgjedhjeve kombëtare në muajin maj. o.j/dita

Ditari i panjohur i Qerim Panaritit për Fan Nolin Posted: 09 Dec 2018 02:08 AM PST Nasho Jorgaqi    Bashkëpunëtor dhe mik i ngushtë i Fan Nolit, publicist i shquar, veprimtar aktiv i “Vatrës”, kryeredaktor i gazetës “Dielli”, i diplomuar për gazetari (1926), patriot i flaktë, antifashist e demokrat, analist në shtypin qendror amerikan, një nga autorët e librit “Përpjekja shqiptare në botën e vjetër e të re përgatitës dhe botues i veprës së Faik Konicës” Shqipëria, kopshti shkëmbor i Evropës Juglindore” dhe “Albumi II” të  Nolit, i pari biograf i tij. La me dorëshkrim disa vepra si “Historiku i historisë shqiptare të Masaccusetsit”, “Historia e Shqipërisë” dhe Dritaret (1936-1959) etj… Në vitin 1993 kur shkova në SHBA për herë të parë pata rastin të njihesha me gruan e tij, zonjën Sarah Panariti, profesoreshë e Harvardit, e cila më dha informacione me shumë vlerë për jetën dhe trashëgiminë e tij shkencore -artistike. Gjithashtu falë fisnikërisë së saj më dhuroi atë pjesë të ditarit shumë vjeçar të Qerimit që shkruante për F. Nolin, që po i jepen për herë të parë lexuesit tonë. Janë mendime, mbresa dhe konstatime të Qerimit gjatë 33 viteve që hedhin dritë mbi jetën e Nolit nga pozita dashamirëse dhe realiteti, pa kursyer herë-herë dhe kritika. Nga biografia që ai ka shkruar: “Noli: Princi i pakurorëzuar i Rilindjes Shqiptare” po botojmë kapitullin “Noli, njeriu dhe karakteri i tij” Qerim Panariti NGA “DRITARET” (1936- 1959) 1936 21 janar — Pata një bisedë me F. Nolin. Ai është njeri interesant, i kulturuar dhe i mirinformuar, por rrëshqitës dhe inatçi. 20 prill –  F, Noli refuzon të marrë pjesë në një banket për nder të tij, të cilin e sponsorizova unë. Arsyeja? Ska. Mendoj se është një sjellje fëminore. 17 maj – Shqiptaret bëjnë mbledhje vjetore në Shën Gjergj. Çfarë mbledhje? Një shtëpi vërtet e çmendur. F. Noli është fajtor për gjithçka. S'mund ta marrë dot me mend se cc’qëdnron pas veprimeve të tij. 1937 22 qershor — Mora pjesë në koncertin e diplomimin në Konservatorin e Nju-Englandit ku F. N. iu dha diploma për kompozim. Hëngrëm drekën bashkë dhe biseduam gjithçka nën rrezet e Diellit për katër orë rresht. 30 qershor — I shkreti F. Noli. është ngatërruar keq me një artikull të botuar të hënën e kaluar në gazetën “Post” ku cilësohet si antimuhamedan. 3 shtator — Hëngra drekë me F. Nolin, Ai është një bashkëbisedues i këndshëm , dallohet për sensin e humorit dhe intelektin. 8 shtator — Isha në një koncert të ËPA në Biblioteklën pUblike të Bostonit, ku u ekzekutua një kompozim i Nolit, i titulluar “Lumi i Babilonisë. Noli ishte aty. 1938 21 qershor – Sot F. Noli mori titullin baçelor nga Konservatori i Nju Englandit. 19 korrik – Fan Noli është deri diku i pakënaqur, lidhur me një artikull timin për të ku unë e akuzoj për mosçuarjen deri në fund të Reformës Agrare propozuar prej tij. 1942 24 maj – Hëngra darkë me F. Nolin. E pagoi ai. Biseduam gjatë për Frontin e Bashkuar shqiptar. Ai ka një mendim të keq për Konicën, Çekrezin dhe Zogun. Por ai mendon se Fronti duhet të plotësohet. U bë një mbledhje e "Albanien Relief Fund", por nuk erdhën shumë. Në mbrëmje une deklarova: “Jam përgjegjës për Frontin shqiptar" 30 maj – Në mbrëmje takova F. Nolin dhe biseduam për "Frontin e Bashkuar shqiptar". Sikurse dhe unë, ai mendon se duhet të përpiqemi shumë për t'u organizuar. Ai mund të ketë ndonjë interes personal, kryesisht për të nxjerrë ca para nga Zogu. 13 qershor – F. Noli po bëhet shumë aktiv në Frontin e Bashkuar. Ai do të shkojë në Nju-Jork dhe Filadelfia. Sulmet e tij kundër Çekrezit janë shumë dërrmuese. 21 qershor – F. Noli shprehu qëndrimin e tij në favor të Frontit të Bashkuar me Zogun në krye dhe një qeveri mbretërore në mërgim. Ai është i nderuar, i qetë dhe në dukje fitimtar. Ai ishte kryetari i mbledhjes dhe kjo qe një nga mbledhjet më të mira shqiptare, në të cilën kam marrë pjesë ndonjëherë. 11 korrik – F. Noli më çoi fjalë të marr pjesë nesër mbasdite në një mbledhje midis "Vatrës" dhe grupit të Çekrezit për të themeluar Frontin e Bashkuar. 1943 23 shkurt – Fola në telefon me F. Nolin. Mund të filloj të shkruaj së shpejti te "Dielli". Nëse jo, do të shkoj të punoj diku gjetkë. 5 mars – F. Noli praktikisht drejton "Diellin". Po e godet Çekrezin. 16 mars – U pashë më Nolin dhe e falënderova për deklaratat e bëra në Nju-Jork para dy javësh lidhur me Frontin e Bashkuar. 26 maj – F. Noli mori një letër nga Zogu ku i kërkonte të shkonte në Uashington si përfaqësues i tij. Është e kotë të them se ai do të pranojë. 27 maj – Mora një letër nga Kosta Isak, me sugjerimin e Çekrezit për të arritur një marrëveshje me "Vatrën", lidhur me Frontin e Bashkuar. Çekrezi ofron kushte për pranimin e Zogut si udhëheqës. Do t'i shkruaj Çekrezit nesër. 8 korrik – F. Noli është regjistruar në Universitetin e Bostonit për një punim pasuniversitar (Graduate) për Doktor në filozofi. (Ph. D.). Në moshën e tij ai akoma shkon në shkollë. 16 gusht – Sot F. Noli erdhi në zyrën e "Vatrës". Ai ka marrë një letër nga OËI për të dhënë lajme për shqiptarët në Shqipëri në gjuhën shqipe. 11 shtator – Noli u nis për në Nju-Jork për të folur nesër në radio.   1944 30 shtator – F. Noli u kthye mbrëmë. Ai ishte në Nju-Jork, i thirrur nga zyra e I e Luftës për t'u folur shqiptarëve që të mbështesin ushtritë aleate. Ai ka pasues të shumtë që e ndjekin në Shqipëri dhe e shohin si udhëheqësin e tyre. 31 tetor – F. Noli është duke punuar për organizimin nga të gjitha kishat që të dërgojnë telegrame forcave aleate për njohjen e qeverisë shqiptare të Beratit. 16 nëntor – F. Noli erdhi pas pak t'i hedhë një sy materialeve që solla nga Uashingtoni. Është material i mirë po të na kish arritur në kohë. 1945 21 maj – Sot F. Noli mori doktoratën. 27 korrik – Fare rastësisht mbasdite takova F. Nolin. Bëmë një shëtitje të gjatë. Është shumë i pakënaqur nga punët e kishës. Shqiptarët janë fëmijë të rritur. Ai kërkon të dalë në pension, të heqë dorë plotësisht nga kisha. 30 korrik – F. Noli ka shqetësime të ndryshme nga njerëzit e kishës. Është e vështirë të kesh të bësh me njerëz injorantë, sepse ata nuk i binden rregullave. Dhe nuk i binden shumicës. 22 shtator – F. N. ka një problem. Prifti do të ikë, por shqetësimi nuk mbaron. 20 nëntor- F. Nolit i janë paraqitur nderime nga shkrimtarë shqiptarë. 28 nëntor – Hëngra darkë me F. Nolin, me z. Messinger dhe Rev. Upson. Që të tre janë studiues të dëgjuar. 1946 2 janar- F. Noli ka shumë shqetësime me komunitetin e tij. Më vjen keq për të se është duke humbur kohë dhe po duron shumë kërcënime nga njerëz injorantë. 26 janar – Akoma më shumë shqetësime janë krijuar prej disa nga kishat e tij, veçanërisht me atë të Filadelfias… Shqipëria ka bërë kërkesë në OKB. 14 mars – F. Noli ose unë do të na duhet të shkojmë në Uashington javën që vjen meqenëse na është kërkuar nga legata jugosllave për të dhenë një informacion të saktë, ku të kërkojmë pranimin e Shqipërisë në OKB më 25 të këtij muaji. 15 mars – Një delegacion prej 4 shqiptarësh nga Nju-Jorku erdhën sot për t'u takuar me Nolin dhe i kërkuan të merrte drejtimin e luftës kundër propagandës greke. Ai e pranoi këtë ofertë dhe do të shkojë në Uashington javën që vjen. 30 mars – Sot në mëngjes F. Noli erdhi në zyrë shpejt, me qëllim që të përgatisnim bashkë disa telegrame për gjithë senatorët e Komitetit të Marrëdhënieve me Jashtë për kalimin e rezolutave… F. Noli më kërkoi të punoj si sekretar në "punën e tij të re'. 4 prill – Të tjera lajme të këqija për Shqipërinë. Anglia është tërhequr nga bisedimet për Shqipërinë. F. Nolin e duan dhe e urrejnë gjithandej. Për sytë e disave unë vij pas tij. 5 prill – Gjithë ditën kam qenë i zënë duke punuar me shpejtësi të madhe… Do bëj, veç punës sonë, gjithë korrespondencën e Nolit që është e konsiderueshme. 8 prill – Këtë mbasdite Noli u nis për në Nju-Jork. Sot u njoftua se Anglia ka hapur përsëri bisedimet me Shqipërinë. 12 prill – Noli u kthye nga Nju-Jorku ku ishte për t'u takuar nga delegacionet e OKB-së, por u takua vetëm me disa prej tyre. Do të kthehet prapë në Nju-Jork javën tjetër. 13 prill – F. Noli më paguan 10 dollarë për punën që bëj me këtë "kryqëzatë të re" që ka filluar ai. Anglishtja e F. Nolit nuk është shumë idiomatike dhe atij nuk i pëlqen ta korrigjojë. 15 prill – Përsëri F. Noli u nis për në Nju-Jork. I shkreti ai, po përpiqet  shumë të arrijë diçka, po do të ndodhet para një kohe shumë të vështirë për aq sa SHBA do të jetë kundër Shqipërisë. 19 prill – F. Noli është takuar me kryetarët e delegacioneve të Anglisë, Hollandës, Polonisë. Ai raporton për rezultate të mira. 26 prill – F. Noli ndodhet akoma në Nju-Jork. Sipas raportit të tij del se është takuar me ambasadorin Gromiko. 13 maj – Nga të gjitha anët e SHBA po vijnë të holla për F. Nolin. Padyshim ai i di se si i nxjerr këto para nga shqiptarët. … Ai e meriton këtë, sepse ka dhënë gjithë jetën për Shqipërinë. Sa për dreq, është shumë koprac. 29 maj – F. Noli ka marrë disa informacione nga Hoxha, lidhur me delegacionet e panumërta. 1 qershor  – Natën e kaluar F. Noli u kthye nga Nju-Jorku dhe këtë mbasdite bëmë një konferencë. Ai ka marrë 3 mesazhe nga Hoxha, të cilat na japin disa ide përfundimtare përsa i përket lidhjeve mes SHBA dhe Shqipërisë. Shqipëria, së pari, kërkon njohjen dhe pastaj të bisedojë rreth kushteve të pranueshme për të dyja palët. 5 qershor – F. Noli telefonoi nga Nju-Jorku dhe tha se Shqipëria është ftuar në Konferencën Ndërkombëtare të Shëndetësisë. Kjo do të thotë se ne do të jemi në gjendje të marrim informacion të dorës së parë nga Shqipëria nëse do të lejohet të vijë një delegacion. ] 7 qershor – … Do të jem shumë i lumtur të takohem me ta. 13 korrik – F. Noli u kthye për pak kohë. Është pothuaj i pakënaqur nga delegacioni shqiptar. Po kështu jam edhe unë… Ata nuk dinë asgjë për situatën këtu dhe prapë duan të bëhen gjykatës dhe juri për situatën tonë. I8 korrik – F. Noli telefonoi nga Nju-Jorku, deri nesër kërkon të përkthyer Kushtetutën shqiptare. 1947 18maj – Unë dhe Sara shkuam në kishën shqiptare të Shën Gjergjit, ku F. Noli bëri shërbimin në gjuhën angleze. Ishte një gjë e gjatë dhe e mërzitshme. Atje kishte shumë personalitete: Dr. dhe zonja Coon, Rev. Dr. dhe zonja Messinger, prof. La Piana dhe shumë të tjerë. 22 maj – F. Nolit nuk i pëlqen mendimi im për disa kisha që unë i quaj "fashiste". Une jam dakord me të. me disa përjashtime, por prapë kishat nuk e njohin rrezikun e fashizmit. 1948 6 shkurt – Pata një fërkim të vogël me F. Nolin. Javën e kaluar i kërkova atij të shkruajë diçka të shkurtër për 36 vjetorin e "Vatrës". Ai s'ka bërë asgjë dhe kërkon parapagim nga "Vatra". Në këtë mënyrë manifeston egoizmin e tij. 7 shkurt – Më në fund F. Noli ka shkruar një histori të shkurtër për 36 vjetorin e "Vatrës". Sot u takova për pak kohë me të. Të dy u përpoqëm të ruajmë një politikë skrupuloze për të kompensuar fërkimin e djeshëm. 24 prill – U takova pak me F. Nolin dhe i dhashë një çek prej 1000 dollarësh për tekstin shqip të "Skënderbeut". 1949 3 mars – U takova me Nolin për pak minuta. Duket sikur po plaket shpejt, megjithatë prapë shkruan libra. Përsëri po punon për Skënderbeun, një libër të cilin ne ("Vatra") e kemi kontraktuar dhe që mendohet se do të jetë kryer qershorin e ardhshëm. 19 mars – Nuk di ç'të bëj me "Skënderbeun". Kemi akoma shumë kopje të mbetura që nuk shiten. 21 prill – F. Noli po bëhet çdo ditë e më tepër grindavec. Patëm një debat në telefon. Ai kërkonte sot 1000 dollarë për librin e tij "Skënderbeu", të cilin ai ka shkuar dhe ia ka shitur vite më parë një organizate tjetër. 6 maj – U nisa për Nju-Jork me aeroplan… Mbasdite vonë F. Noli erdhi te "Prince Georg", një koincidence… Delegatët na kishin për darkë. 3 qershor – Rev. Thimi Theodosi ishte i mërzitur këtë mëngjes… 22 qershor – Stefan Lasko u dorëzua prift të shtunën e kaluar. 25 dhjetor- U takova për pak kohë me Nolin te Miçeklët. Mendoj se ai diçka ka vendosur me vete. Nuk do të më habiste nëse ai do të favorizojë Dhimitër Trebickën kundër meje për "Diellin" në mbledhjen tonë të ardhshme në korrik. 1950 28 prill – "Skënderbeu" shkoi sot në shtyp. Shtypjen po e bën Crimson Printing Company. 3 shtator – Një peshkop grek u dorëzua sot në Stamboll për grupe të veçanta shqiptarësh në këtë vend, në kundërshtim me F. Nolin. Ai quhet Mark Lipa. 9 tetor-F. Noli është i sëmurë. 8 dhjetor – "Historia e Skënderbeut" erdhi sot. Është lidhur bukur dhe nuk duket i vogël. 17 dhjetor – Peshkop Mark Lipa ka dhënë një intervistë të shkurtër për gazetat e Bostonit. F. Noli është pak i frikësuar. 1951 8 shkurt – Peshkopi i ri shqiptar, me stil vetjak, Mark Lipa, ka shkaktuar një ndarje të tmerrshme në komunitetin më të madh shqiptar të Bostonit. Është deri diku e habitshme se si ata janë dhënë pas këtij njeriu të panjohur. 17 shkurt – Shqetësimet në mes qarqeve shqiptare të Bostonit do të arrijnë kulmin nesër. Mark Lipa u ligjërua sot në një kishë tjetër. Ai mund ta shfrytëzojë këtë për mirë. 22 shkurt – "Britan Post" ka botuar një intervistë të shkurtër, të cilën F. Noli ia dha reporterit të martën. 25 mars – Patëm mbledhjen e bordit të "Vatrës". Me disa kundërshtime vendosëm të hapim një fushatë për të blerë një shtëpi për Nolin. 28 mars – Më shqetëson pak fakti se sa do të mbështetet fushata për t'i blerë një shtëpi Nolit. Është një punë e madhe dhe kërkon përpjekje të mëdha. Ndërkohë duhet bërë edhe puna e përditshme. Lajmet nga Ballkani janë shqetësuese dhe Shqipëria është në ballë. 29 mars – F. Noli është deri diku i kënaqur me fushatën time (të "Vatrës"). Megjithatë do të më duhet një shumë e madhe që të blejmë një shtëpi të përshtatshme sepse çmimet në të vërtetë, sikurse gjërat e tjera, janë shumë të larta. Kjo do të thotë një punë shumë e rëndë për mua. 6 prill – Fushata për F. Nolin pati një fillim të mirë natën e kaluar, kur zonjat e Kishës së Shën Gjergjit dhanë 1000 dollarë për fushatën. 18 prill – Kisha shqiptare e Shën Gjergjit dha natën e kaluar 1500 dollarë për fushatën e Nolit, filluar nga "Vatra" më 25 mars. Deri tani nuk kemi marrë asgjë nga ndonjë koloni e veçantë. Kjo më shqetëson pak, por çdo gjë lëviz me ngadalë në fillim. 22 prill – Crist Ellis u dorëzua prift… 27 prill – Me aq sa dimë ne, degët tona akoma nuk kanë filluar të lëvizin për të mbledhur para për fushatën e shtëpisë së Nolit. 28 prill – Po filloj të shqetësohem për fushatën e shtëpisë së Nolit. Gjërat lëvizin ngadalë. 20 maj – Mblodhëm gati 185 dollarë për fondin e shtëpisë së peshkop Nolit. Jam i gëzuar që fushata po ecën. 25 maj – Rreth orës 4 mbasdite, Sara dhe unë u nisëm për në Mançester. Fillova të mbledh… 5 qershor – Grindja midis shqiptarëve rreth peshkop M. Lipës ka arritur në një shkalle qesharake. Madje edhe gjykatësit edhe avokatët po hungërojnë nga qejfi. 19 qershor – Mora 200 dollarë për fondin e shtëpisë së Nolit. "Bashkimi" po llomotit shumë në gjithë Amerikën në mes shqiptarëve. Kjo gjë po më shqetëson shumë. 26 qershor – Fushata për Nolin po ecën shumë ngadalë. Ajo nuk i ka përmbushur shpresat e mia dhe unë jam shumë i dëshpëruar. 27 qershor – Po vijnë të holla nga të gjitha degët, ndërkohë që afrohet Kuvendi. Vetëm se është fakt se nuk po vijnë aq sa duhet për fondin e shtëpisë së Nolit. 7 korrik – Shumica e delegatëve kanë arritur. Disa prej tyre sollën të holla. Grupi i Nju-Jorkut solli 600 dollarë. Pastaj patëm një mbledhje të komitetit mbasdite. Rreth orës 2 u hap Kuvendi. Kryetar u zgjodh Marko Adams. Biseduam dhe diskutuam deri afër mesnatës. F. Noli erdhi, ose më mirë e sollën rreth orës 10. "Bashkimi" me "Shqipërinë e Lirë" ishte tema kryesore e diskutimit. F. Noli nuk u prononcua. Pothuaj të gjithë delegatët ishin për "Bashkimin", por nuk dinë si ta arrijnë këtë. Në duart e mia do të kem një betejë të ashpër. 31 korrik – Korriku iku. Qe një muaj shumë i zënë me punë dhe i pakëndshëm. Kryesorët për shkak të një lëvizjeje për bashkim me një organizatë qesharake, e filluar 10 vjet përpara nga K. Çekrezi, gabimisht e quajtur "Shqipëria e Lirë". Lëvizja që nga kuvendi ka humbur disa momente, por ideja vijon të mbetet. Ajo u fillua nga delegatët shqiptarë ne OKB me synimin për të shkatërruar "Vatrën" dhe për të dobësuar ndikimin e F. Nolit. 8 tetor – F. Noli u thirr sot në "COUNT" lidhur me bëmat e M. Lipës në kishat shqiptare ne Bostonin e Jugut. Por më thanë se Nolit nuk i bënë asnjë pyetje. 1952 13 mars – Peshkopi M. Lipa, agjent grek, po bën zhurmë të madhe. Ai po përdor komunizmin për t'i hutuar dhe frikësuar shqiptarët në këtë vend. 26 mars – Këtë mbasdite F. Noli u nis për në Çikago që të asistojë në shpëtimin e kishës shqiptare nga thonjtë e M. Lipës. 7 prill – Uorçesteri ka hapur një fushatë për shtëpinë e Nolit. Është mbledhur një shumë e konsiderueshme. 10 qershor – Sot mora nga Nju-Jorku 1088 dollarë për fondin e shtëpisë së Nolit. 30 nëntor – Nga dreka shkova në kishën shqiptare ku, mbas shërbesës fetare u bënë festime për Ditën e Pavarësisë së Shqipërisë. Unë kryesova mbledhjen edhe pse isha lënë jashtë nga banda e "Shqipërisë së Lirë". 1955 14 shkurt – Nesër peshkop Noli shkon për pushime në Florida. 22 mars – Kalova pothuaj gjithë ditën në shtypshkronjë dhe nuk e di se si do të dalë gazeta. Ishte vetëm një njeri që punonte aty… Peshkop Noli më dërgoi sot një shportë me portokalle dhe qitro. Nuk e di se ç'ka ndodhur me të! 17 qershor  – Sonte kishim për darkë F. Nolin. Ai ka shqetësime me dhëmbët dhe për këtë shkak mund të hajë vetëm supë dhe disa ushqime të tjera të buta. Ai është një personalitet interesant. 1956 25 qershor – Kristo Thana do të jetë kryetari i banketit për F. Nolin. Muhamet Zeqari nga Detroiti do të jetë dollibashi. Një çift i mirë. 17 korrik – U takova shkurt me 'Mjekrën". Është shumë i zënë me rregullimin e "Dhiatës se re" në shqip. 3 shtator – Banketi për F. Nolin, për 50 vjetorin e ardhjes në këtë vend shkoi mirë. Morën pjesë rreth 450 të ftuar. Fjalimet ishin të gjata e te mërzitshme. F. Noli mori një shumë te konsiderueshme të hollash. 9 shtator – Pata një ditë shumë të ngarkuar duke u përpjekur të rregulloja llogaritë e banketit të F. Nolit. Është një rrëmujë e madhe. Duhet bërë shumë për te mbajtur çdo gjë në rregull. 22 shtator – F. Noli është interesuar të shkruajë një libër për Ali Pashën nëse "Vatra" do ta sponsorizojë. 12 tetor – "Balli" po më ngre nervat; shumë zhurmë për asgjë; shkruhen fjalë, fjalë, fjalë, asgjë tjetër veç fjalë boshe. 1957 8 maj – Peshkop Noli mbaroi hyrjen për librin e Konicës. Është e mirë. 4 tetor- "Shqipëria – kopshti shkëmbor i Evropës juglindore" arriti sot mbasdite. Duket i bukur. Jemi gati të tronditur… F. Noli, gjithashtu, është i kënaqur me të. 1958 8 maj – Për disa dite F. Noli ka qenë i sëmurë. Ai ka qenë nën kujdesin e dy mjekëve. 26 korrik – Sonte patëm F. Nolin për darkë. 13 nëntor – Punova me "Diellin" e vjetër në shkollën shqipe të së Dielës, qendër ku kemi vendosur koleksione të vjetra. Faqet janë dëmtuar. Unë lexova numrin e parë – 15 shkurt 1909. Më bëri përshtypje politika e "Diellit" për një Shqipëri të pavarur, shkruar hapur nga F. Noli. Kërkesat ndaj Turqisë përfshijnë katër vilajetet e mëdha. 1959 7 shkurt – Sot kishim për darkë F. Nolin. Ai është shumë interesant. Sara e pëlqen pa masë. 20 shkurt -Punova për një thirrje të cilën do ta firmosë F. Noli dhe ne do ta botojmë te "Dielli" si një fushatë për të holla lidhur me përvjetorin e artë (50 vjetorin) të "Diellit". 16 prill – Mora një shportë me fruta nga Noli, dërguar nga Florida. Qerim Panariti NOLI: NJERIU DHE KARAKTERI I TIJ Noli ish një person kompleks dhe ekstraordinar i shumë-anëshmë nga çdo pikëpamje: i thellë dhe i gjerë nga mejtimet, enciklopedik nga dituria, "rebel" që nga vogjëlia dhe një gjigant intelektual. Ndjenjën si "rebel" e manifestoj në gjimnazën Greke në Endrene në vitin e fundit akademik, kur autoritetet e gjimnazit pushuan nga puna një nga profesorët më të çkathtë, Noli kujtoj se profesorit iu bë një padrejtësi dhe një -me-një organizoj një demonstrate të studentëve në favorë të profesorit. Për shkak të këtij rebelimi, autoritetet e gjimnazit refuzuan t'i japin diplomën gjer në Shtator në vënt t'ia jepnin në Qershor, sipas zakonit. Si person Noli gëzonte të gjitha të metat e njeriut plus të metat e tij si individual. Le të fillojmë pra, nga disa cilësira elementare. Noli ish person sekretive. Ish e pamundur për të që t'i hapte zëmrën njeriu pa rezervë. Këtë karakteristikë thuhet s'e gëzojnë pothuaj se të gjithë njerëzit e lartë nga mejtimet, që kanë fatin e keq të lindin në një sistem social të mbyllur si Turqia, një sistem i mbytur në errësirë dhe i rrethuar me spiunë dhe intriganë çpifarakë. Si njeri i ndrojtur dhe suspekt, munt të thuhet se Noli kish me qindra miq, me mijëra admironjës, po s'kish asnjëckë konfidant, domethënë njeri që t'i hapte zëmrën një qint per qint; kurdoherë ish i rezervuar. Për këtë shkak ish e pamundur qe t'i hynte dot njeri në shpirtin dhe ndjenjën e tij. Në Shqiptarët e Amerikës Noli e kish humbur besimin krejt "Të lenë", thosh, "si gunën e vjetër." Në fshatarët e Shqipërisë kish një dashuri të madhe. Fshatari i thjeshtë, thosh Noli, gëzon akoma besnikërinë primitive kur të kupton që s'ke qellim t'a shfrytëzosh dhe te përfitosh nga ignoranca e tij, kurse Shqiptarin' e Amerikës e ka korruptuar komercializma dhe beson se s'munt të bësh dot tregëti "me kryq në ballë". Noli e shikonte jetën si komedi. Në një rast e pyeta sepse nuk gjen një zëvëndës për të shpëtuar nga andrrallat e përditme? M'u përgjiq shkurtazi: "Ç'e duan peshkopnë këta, kurse s'më degjojne mua, si munt të rrojnë në harmoni me tjetër peshkop?" . Përgjigje komike, po tepër profetike. Noli s'ish njeri materialist. Bënte një jetë të thjeshtë. Vishej dhe mbathej paq, po kurdoher thjeshtë. Banoj më tepër se 30 vjet në një apartment të vjetër dhe me mobila mos më keq. Noli s'ish mikpritës si Faik Konitza. Po të dilnje jashtë me të ish e pamundur që të vinte dorën në xhept. Po t'a vizitonje në shtëpi s'të ofëronte asnjë kupë ujë. Qëndrimi i Nolit në lidhje më mikpritësinë munt të justifikohet lehtë. Njeriu pothuaj se mbante shtëpinë hapur për vizitorët, miq dhe kundërshtarët. Po t'i priste të gjithë me gostira, duhet të ish miliuner. E vërteta është që Noli më 1940 bëri një jetë miserablile, mezi pikej për të përballur shpenzimet vetiake. Përveç kësaj, vizitorët i merrnin kohën më kot. Për te shpëtuar nga monotonia e mysafirëve, Noli kish gjetur një formulë unike dhe interesante. Kur vizitorët kalonin masën e "miqësisë", iu thosh: "M'u tha goja, munt të dalim këtu pranë të lagim gojën me një kafe?" Kur mbaronin kafenë Noli iu linte shëndet dhe kthehej në shtëpi. Këtë taktikë fillova t'a përdor dhe unë, po s'korra dot sukses. Vizitorët pas kafesë, kthehëshin përsëri në zyrën e "Vatrës" bashkë me mua. Në një rast pyeta Nolin se si kish duruar me Shqiptarët një jetë të tërë? M'u përgjigj me katër fjalë: "Me ka zënë shqipia". Pastaj shtoj: "Shqipëria, si një popull i vogël dhe i shtypur prej armiqve të jashtmë dhe të brëndëshmë, ka nevojë për njerës idealistë që janë gati të bëjnë sakrifica personale për një qëllim të shënjtë dhe të lartë." Noli s'ish egoist hakmarrës. Të lëftonte me mish dhe me shpirt kur cenohej interesi i përgjithmë i çështjes. Nga ana tjetër s'e kish për turp të të shtrëngonte dorën kur fitohej lufta. Këtë karakteristikë admirable Noli e përdori kur erdhi Mark Lipa n' Amerikë, më 1950, dhe disa nga shokët e vjetër defektuan dhe u hothne me renegatin. Noli së pari, u dëshpërua, por kur defektonjësit ia pinë lëngun Lipës dhe u kthyen në udhën e mbarë, Noli i priti me enthusiazmë dhe s'ua përmendi kurrë defektimin. Në një rast pyeta Nolin se si shkonte me Lipistët dhe nëse parashikonte nonjë rrezik prej tyre? Ay m'u përgjigj pa hezituar, "Jo aspak", dhe shtoj: "Këta janë bashkëluftëtarët tonë, tani që u kthyen në udhën e mbarë, duhet t'u falim gabimin, se të gjithë kemi bërë gabime nga koha në kohë, kështu pra, s'duhet t'i përdorim si kollonialë". Noli ish hamës i math, kur gëzonte shëndet dhe plot humor dhe shakara. Që më 1952 e kishim bërë zakon t'a ftonim Nolin për drekë dy herë në vit, në Qërshor dhe në Tetor, kur fillonin dhe kur nisin të mbaronin zarzavatet e baçës sonë. Në fillim hante vetëm zarzavate, po më vonë kur e kërcënuan doktorët se po të mos hante mish, i kish ditët të shkurtëra, filloj me dashje a padashje, të hajë mish. Herën e fundit që e patmë për drekë ish më 11 Qershor, 1964. Në këtë rast gjellët vetëm i cënoj po s'i hëngri. Kjo na vuri në dyshim se Noli po i shkurtohëshin ditët. * * * Diku në fletët e shkruara kemi bërë fjalë se si Noli filloi luftën me Grekët në Edrene kur ish nentëmbëdhjetë vjet djalë, kur gjimnazi i vonoj t'i japë diplomën për shkak se mori anën e një profesori të pushuar nga puna. Që ahere dhe gjer sa mbylli sytë Noli urrente Grekët dhe Grekët urrenin Nolin. Që posa u dorëzua prif, më 1908, Grekët filluan propagandën dhe anathemat për çkredituar Nolin përpara popullit Shqiptar. Çpifjet dhe kallëzimet kundër tij ishin aqë banale sa dhe primitive. E kallëzonin si anti-kanonik, si "apostate" (femohonjes) dhe klishera të tjera që s'kishin as anë as funt. Noli i kapërceu të gjitha këto çpifje dhe triumfoj duke shpënë kishën Shqiptare autoqefale në Shqipëri. S'bëjmë nonjë zbulim të ri po të thomi se Noli ish njeri i shekullit njëzet qe besonte me gjithë shpirt në lirin' e mejtimit, të bazuar në shkencën dhe në historinë e mejtimeve të lira, dhe si person i tillë, ish e pamundur për të që të besonte në lindje virgjineshas, po nga ana tjatrë, Noli e besonte dhe e adhuronte Krishtin si profetin më të lartë që ka lindur bota përpara dhe pas Krishtit. Ritet Ortodokse i përformonte me dignitet dhe solemnitet, po nuk pranonte supërsticionet e klerikëve hipokritë medievalë që tallën me njerëzinë duke iu premtuar jetë të përtejme. Për Nolin theorira të tilla i kanë rrënjët në kohë të errëta që s'munt të gëlltitëshin dot prej një person me kulturë të gjerë si të Nolit. Mbanj mënt një ditë pyeta Nolin sepse Krishterimi konsideron Krishtin si "Shpëtimtarin e botës?" Këtë pyetja ua kam bërë shumë klerikëve të dogmave të ndryshme të Krishterimit, po përgjigjen më te sqaruar ma dha Noli. Mejtimi Nolian në lidhje me Krishtin (i parafrazuar) ish ky: Nga të gjithë profetët e shënuar të botës përpara dhe pas Krishtit, Jisui ësht' i vetëmi profet që prokllamoj për herën e parë në historin' e njerëzimit, njësi dhe egalitet në botë. Kjo ish një dekllaratë revolucionare në një kohë kur njerëzit bliheshin dhe shiteshin në pazart si kafshët. Krishti u mundua që të shpartallonte këtë sistem barbar. Për këtë shkak u kryqëzua prej kllasave që shfrytëzonin popullin me anë të fesë. Pas mejtimit Nolian Krishti ish patriot Israelit që u mundua të çlironjë popullin e tij nga robëria Romane. Krishti inspiroj Nolin që t'i dedikonjë jetën çlirimit të popullit Shqiptar nga robëria Turke dhe Orthodoskët Shqiptarë nga errësira e Patrikanës. Predikmet e Nolit ishin kurdoherë në baza sociale humanitariane që munt të karakterizohen me predikimet e pashtrëmbëruara të Krishtit. Karshi prallave sipërnaturale Noli munt të karakterizohet si agnostik, domethënë një person që as pohon as mohon ndodhjen mistike të forcave sipërnaturale. Kjo me pak fjalë, ish feja e Fan Stilian Nolit.

Studentët: Ja 8 kërkesat tona për MAS, do presim deri të martën Posted: 09 Dec 2018 02:00 AM PST Pavarësisht se fundjavë dhe kushtet atmosferike nuk janë të favorshme, studentët kanë dalë sërish sot në protestë para Ministrisë  së Arsimit, Sporteve dhe Rinisë. Në ditën e gjashtë të protestës, studentët përsërisin se nuk do të ketë tërheqje deri në plotësimin e kërkesave të tyre dhe se kjo protestë nuk ka asnjë lidhje me politikën. Sot protestës i janë bashkuar edhe studentët e universitetit të Shkodrës "Luigj Gurakuqi" të cilët kanë vendosur që ditën e sotme të mos protestojnë në Shkodër por t'i bashkohen protestës së studentëve në Tiranë. Protestuesit thonë se qeveria ka afat deri të martën për të plotësuar kërkesat e tyre. "Për ministrinë dhe qeverinë kemi të njëjtat kërkesa me 8 pika. Deri të martën është ultimatumi dhe të martën është protesta më e madhe e parë ndonjëherë"- tha një nga studentët. o.j./ dita

“Dhjetori ’90, një skenar. Kaluam nga dollomatë te kostumet Armani” Posted: 09 Dec 2018 01:47 AM PST Për ish-të dënuarin politik, Daut Gumeni, në dhjetor 1990 nuk ka pati “revolucion demokratik” dhe gjithçka ishte një skenar i ish-Presidentit Ramiz Alia. "Mjafton të shohësh morinë e kujtimeve të "dhjetoristëve" e të "ndihmës-dhjetoristëve" të shumtë dhe garën e tyre të ethshme për të na dëshmuar se si e përmbysën diktaturën nën "udhëheqjen e ndritur të presidentit tonë Ramiz Alia" të cilit i "shkonte e gjithë mirënjohja" e komunistëve të deleguar po prej tij si demokratikas, dhe del sheshit që në ato ditë të ftohta dhjetori Gëbelsi i Partisë së Punës na dha një shfaqje sa për të qetësuar zemërimin e popullit të uritur dhe kryesisht për të mbajtur pushtetin me kastën e vet", – thotë ai në një intervistë për "Dita" botuar në 2015, pjesë nga e cila po risjellim më poshtë: – Zoti Gumeni, si ish-i burgosur politik i diktaturës, besoj se kini ndjekur kremtimet që u bënë me rastin e lëvizjes studentore që shënoi fundin e asaj diktature. Çfarë përshtypje ju la shënimi i këtij përvjetori? – Kremtimet e "lëvizjes studentore", sikundër e quani dhe ju tok me pushtetarët e tranzicionit tonë të gjatë e të mundimshëm, i kam ndjekur si të gjithë qytetarët e këtij vendi, që e kanë konsum të detyruar jehonën mediatike të ngjarjeve politike e gjithnjë me urdhër të politikës. Përshtypja ime nuk se ka ndryshuar shumë në rrjedhën e viteve e të kremtimeve të atij përvjetori. Vetë kremtimet e ndara të asaj ngjarjeje të vendosur midis dy periudhave të sundimit të komunizmit shqiptar, janë një dëshmi e qartë se në ato ditë dhjetori të vitit 1990 nuk ka pasur as revolucion e as përmbysje demokratike, sikundër gjëmon propaganda e tranzicionit tonë të pasosur. Mjafton të shohësh morinë e kujtimeve të "dhjetoristëve" e të "ndihmës-dhjetoristëve" të shumtë dhe garën e tyre të ethshme për të na dëshmuar se si e përmbysën diktaturën nën "udhëheqjen e ndritur të presidentit tonë Ramiz Alia" të cilit i "shkonte e gjithë mirënjohja" e komunistëve të deleguar po prej tij si demokratikas, dhe del sheshit që në ato ditë të ftohta dhjetori Gëbelsi i Partisë së Punës na dha një shfaqje sa për të qetësuar zemërimin e popullit të uritur dhe kryesisht për të mbajtur pushtetin me kastën e vet. Rekuizita demokratikase me pardesytë e bardha fringo, nuk e bën dot" përmbysje të madhe" atë shfaqje për të kaluar nga sundimi i hapët i diktaturës komuniste në një sundim të "komunizmit liberal" të veshur jo më me dollomatë sovjetike por me kostume elegante Armani. Nuk e merr dot vesh njeriu i shkretë as pse na grinden aq keq me shoshoq dhjetoristët-aktorë, nëse qenë dhe këta "200 petrita" apo ca më shumë. E rëndësishme është që t'i kemi me shëndet që ta festojnë gjithmonë përvjetorin e shfaqjes me temë "përmbysja e diktaturës komuniste" nga të besuarit e po asaj diktature. – Si e shpjegoni faktin që Sali Berisha vazhdon të jetë aq ndikues edhe pas kaq vjetësh në politikën shqiptare? – Më mirë do të ishte që këtë pyetje t'ia bënit vetë personit në fjalë, se mbase tani, që është në moshën e tretë dhe jo pak i lodhur si pushtetar i thekur në të dy llojet e sundimit komunist në Shqipëri, do të gjente një moment të hiqte dorë nga propaganda e të thoshte më në fund dhe një të vërtetë. Për mendimin tim modest, mbase e ka mbajtur më gjatë në pushtet ajo psikoza jonë e vjetër që na shtyn të duam më shumë pushtetarët harbutë e dinakë, të cilët prej një shekulli hedhin valle në kurrizin e shqiptarëve me këngën "Lum moj Shqipëri që na ke!" Por nuk do harruar as fakti tjetër, mbase i pari për nga rëndësia: në këto  vite të komunizmit liberal Shqipëria jonë nuk është lejuar të shkojë nga diktatura në demokraci, por vetëm të hedhë një hap të trembur nga stalinizmi në putinizëm. k.a. / dita

E keni parë varkën lodër te Parku i Liqenit? Shikoni sa bukur duket këndi i ri i lojërave Posted: 09 Dec 2018 01:47 AM PST Dikur një ferishte e madhe, së shpejti do jetë një hapësirë rekreative moderne ku fëmijët mund të argëtohen dhe të kalojnë kohën e tyre të lirë. Çdo ditë e më shumë, po merr formë sheshi i ri rekreativ në jug të Parkut të Madh dhe tashmë vogëlushët nuk do kenë më nevojë për të shkuar deri në det për të luajtur me rërë dhe varka. Kjo pasi sheshi i ri do ti ofrojë të dyja dhe rërën dhe një "varkë" të madhe lodër ku vogëlushët do shndërrohen në kapitenë e marinarë! Specialistët e APR kanë bërë montimin e varkës shumëngjyrëshe, ku fëmijët do mund të luajnë dhe të zhvillojnë imagjinatën e tyre. Krahas saj ky shesh do të shërbejë edhe si një hapësirë sportive për më të rriturit, pasi APR me mbështetjen e TIKA-s po monton edhe module lojërash sportive. o.j/dita

Nga protesta në ‘leksionet’ e partisë. Basha dërgon militantët te studentët (Foto) Posted: 09 Dec 2018 01:32 AM PST Pavarësisht përpjekjes së studentëve për ta mbajtur larg politikës protestën e tyre mesa duket diçka e tillë nuk po arrihet. Partia Demokratike dhe Lëvizja Socialiste për Integrim, si në mjaft raste, kanë angazhuar të gjitha strukturat për ta bërë politike protestën e studentëve. Kjo gjë vihet re në fotot e publikuara në rrjetet sociale ku janë të shumta rastet që militantë të PD e LSI tentojnë të "vjedhin" kauzën e studentëve. I tillë është edhe rasti i fotos së mëposhtme ku pjesë e protestës është bërë edhe motra e kreut të FRPD Shkodër, Arvit Bushati. Personi në foton e mëposhtme është Kristina Tonaj, anëtare e FRPD Shkodër totalisht e “papolitizuar”! Kështu, paradite ithtarët e dy partive opozitare hiqen si protestues me statusin e studentit ndërsa pasdite marrin leksione në parti se si të penetrojnë e ti japin ngjyrim politik protestës. Mediat kanë bërë publike edhe mjaft raste të tjera ku anëtarë, kandidatë për deputetë, kryetarë degësh të PD e LSI, janë përfshirë në protestën e studentëve. Me këto raste tregohet qartë se opozita nuk është e prirur që studentëve t'u gjendet një zgjidhje por përkundrazi tenton që situata të tilla ti përdorë për të akumuluar kapital politik. (Lexo.al)   o.j/dita

Ferit Keta, kampion bote në kikboks Posted: 09 Dec 2018 01:25 AM PST Ferit Keta u shpall për herë të parë kampion bote ne kikboks, pasi mundu turkun Fatih Karakus në Mynih. Më 8 shtator Feriti fitoi në eventin e Dibrës së Madhe në boks. Ferit Keta që stërvitet nga trajneri i mirënjohur Ismail Keta fitoi bindshëm duke arritur që ta mposht rivalin e tij dhe të fitoi një titull europe. Kjo ishte ndeshja e 19-të në kikboks për Ketën dhe të gjitha i ka fituar, ndërsa në boks ka 11 ndeshje dhe asnjë humbje.   o.j/dita

“Protestoni fuqishëm, por mos lejoni t’ju mashtrojnë politikisht” Posted: 09 Dec 2018 01:15 AM PST Zef Brozi, ish-kryetari i Gjykatës së Kasacionit ka reaguar duke komentuar protestën e studentëve në Tiranë dhe universitetet në rrethe për tarifat dhe kërkesat e tjera. Ai ka një apel për studentët, që të protestojnë fuqishëm e paqësisht, por 'mos lejoni t'ju mashtrojnë e manipulojnë politikisht'. Ish-kryetari i Gjykatës së Kasacionit vlerëson veprimin e Nikollës, që sipas tij bëri atë që duhej duke iu përgjigjur thirrjes së protestuesve që të dilte nga zyra e të shkonte në shesh tek ata. Brozi shprehet se sot nuk ka asnjë arsye që të gjitha palët e interesuara (Studentët, Qeveria, Parlamenti, Presidenti, Rektoratet, e Dekanatet) të mos ulen në bisedime për të dhënë zgjidhjet jo vetëm për kërkesat e studentëve protestues, por edhe për përmirësimin rrënjësor të arsimit në Shqipëri. Studentët protestojnë prej 5 ditësh para Ministrisë së Arsimit dhe Sportit duke kërkuar plotësimin e tetë kërkesave, kryesorja përgjysmimi i tarifës së arsimit. STATUSI I PLOTË I ZEF BROZIT Të dashur studentë: Protestoni fuqishëm e paqësisht, por mos lejoni t'ju mashtrojnë e manipulojnë politikisht! Si ish-pedagog, si prind e qytetar, por edhe si immigrant në Amerikë që nga 12 Nëntori 1995, përshëndes protestat paqësore të studentëve në Tiranë dhe në qytetet e tjera të vendit. Miqësisht u apeloj studentëve të mos lejojnë manipulimin e tyre nga mafiozët e partive politike a kushdo tjetër. Studentët kanë pasur dhe kanë shumë arsye të protestojnë në këto 28 vite të shkatërrimit të shkollimit dhe edukimit të brezit të ri. E pafalëshme ka qenë heshtja e tyre. Gjendja mjerane dhe kushtet thuajse primitive në konviktet studentore dhe në auditore, korrupsioni marramendës në universitete (që vret dijen dhe përgatitjen e te rejave e te rinjve shqiptarë sipas standarteve të larta që kërkon sot koha), shitja dhe blerja e notave, diplomave, madje edhe e titujve shkencor, niveli i ulët shkencor ( madje dhe skandaloz) i një pjese të pedagogëve, pagesat e papërballueshme nga një pjesë e madhe e studentëve – janë disa nga arsyet që studentët në këto 28 vite duhej të kishin protestuar e jo heshtur. Por studentët dhe rinia shqiptare nuk duhet as të mashtrojnë veten me nota e diploma që blihen edhe pa shkuar në shkollë, pa hapur librat, pa studiuar. Në familjen Europiane dhe kohën e globalizmit sot dhe në të ardhmen konkurohet me dije dhe aftësi të shumanëshme dhe jo me injorancë e dembelizëm (ndërsa diplomat fallco e pa vlerë më mirë i fundosni në baltina). Dihet se gjendja mjeranë në universitetet e shkollat në Shqipëri është produkt dhe përgjegjësi e të gjitha qeverive në këto 28 vite. Pavarësisht se në këto vitet e fundit janë bërë disa hapa pozitiv për arsimin, Qeveria, universitetet, Parlamenti, Presidenti, dhe të gjitha institucionet u janë borxhlinj studentëvë dhe rinisë shqiptare. Prandaj edhe unë u bëj apel atyre të dëgjojnë me respekt dhe përgjegjësi zërin studentor, të ulen e bashkebisedojnë me ta dhe sëbashku të gjejnë zgjidhjet më të mira të mundshme për plotësimin e kërkesave dhe nevojave të studentëvë dhe arsimit në Shqipëri. Nëse me 11 Dhjetor 1990 përfaqësia studentore bëri takimin me Ramiz Alinë edhe pse në kushtet e një frike e terrori, sot nuk ka asnjë arësye që të gjitha palët e interesuara (Studentët, Qeveria, Parlamenti, Presidenti, Rektoratet, e Dekanatet) të mos ulen në bisedime për të dhënë zgjidhjet jo vetëm për kërkesat e studentëve protestues, por edhe për përmirësimin rrënjësor të arsimit në Shqipëri. Përmes internetit mësova se Ministrja e Arësimit Znj. Lindita Nikolla bëri atë që duhej dhe iu përgjigj thirrjes së protestuesve që ajo të dilte nga zyra e të shkonte në shesh tek ata. A duhet, veç të tjerave, që Qeveria, Parlamenti, Presidenca, Rektoratet e Dekanatet të ndërpresin edhe shpenzimet e tyre për luks në zyra dhe ato fonde të investohen për godinat dhe ambientet studentore? Të dashur studentë: Protestoni fuqishëm e paqësisht, por mos lejoni t'ju mashtrojnë e manipulojnë politikisht! Për të mirën tuaj dhe të Shqipërisë sonë të dashur. Zef Brozi, Washington, DC 8 Dhjetor 2018   o.j/dita

You are subscribed to email updates from Gazeta Dita. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States

loading...

Lexo edhe: