Republika e Kosovës dhe ajo e Shqipërisë kanë nënshkruar një marrëveshje të premten për të hequr taksat e dyfishta në mesë të dyja vendeve të cilat jo pakë herë kanë penguar zhvillimin e bizneseve dhe depërtimin e tyre në vendet respektive.
Ministri i Financave, Besim Beqaj bashkë me homologun e tij Shkëlqim Cani, kanë nënshkruar sot “Marrëveshjen ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për Shmangien e Tatimit të Dyfishtë lidhur me Tatimet mbi të Ardhurat dhe mbi Kapitalin dhe për Parandalimin e Evazionit Fiskal” si dhe “Marrëveshjen për heqjen e Tatimit të Vlerës së Shtuar në import për librat, produktet e përafërta me librin, gazetat, revistat, periodikët si dhe materialet e ngjashme të shtypit të publikuara në Republikën e Shqipërisë apo në Republikën e Kosovës”.Këto marrëveshje sipas Beqajt, kanë treguar edhe njëherë orientimet vëllazërore të të dy shteteve, duke shprehur gatishmërinë e Qeverisë së Kosovës për të bashkëpunuar edhe më ngushtë.
“Pra ne si dy ministra të Financave, në këndvështrimin e mundësimit të lëvizjes së këtyre mallrave tani më kemi bërë punën tonë dhe ju urojmë sferave të edukimit dhe akademive të shkencave që të bashkëpunojmë sa ma frytshëm dhe të krijojmë një ambient të përbashkët në fushën e edukimit”, ka thënë ministri Beqaj.
Ai më tej bëri të ditur se gjatë vizitës së homologut e tij shqiptar Cani, ka bashkëbiseduar edhe për avancimin e procesit për krijimin e bazës për menaxhim të integruar të kufirit. Ai ka informuar po ashtu se është hequr barriera edhe për gypat e çelikut dhe po ashtu është hequr edhe leja e veçantë që ka qenë për tranzitimin e cigareve.
E ministri i Financave të Republikës së Shqipërisë, Shkelqim Cani shpreson se herën tjetër të nënshkruajnë më shumë marrëveshje dhe secila vizitë e tij të jetë me rezultate të mëdha.
“Është kënaqësi të vijë për herë të dytë për një kohë të shkurtër për të nënshkruar dy marrëveshje natyris ht që uroj që herën e tretë kur të vijë nënshkruajmë tre marrëveshje, ndoshta dhe gjashtë sepse hapësira, dëshira dhe vullneti nuk na mungon, kështu që urojmë që të shtohet numri i marrëveshjeve”, ka thënë Cani.
Të dy ministrat kanë rënë dakord edhe për inkurajimin e dy Dhomave të Tregtisë për një marrëveshje ose memorandum mirëkuptimi sa më të shpejtë në ndihmë të tyre.
Të dy Ministrat gjithashtu inkurajuan edhe Ministritë të tjera për bashkëpunim sa më të madh sidomos për një menaxhim të integruar të kufijve dhe me një godinë të përbashkët, ku së bashku doganierët tanë të kryejnë detyra ndaj të dy vendeve.
Burimi: Telegrafi
loading...
Lexo edhe:
