“Konflikt mes dy të rinjve në Elbasan, shmanget tragjedia” plus 9 more - Gazeta Dita

---

• Konflikt mes dy të rinjve në Elbasan, shmanget tragjedia
• Vranë pronarin e marketit në Kamëz, gjykata lë në burg dy autorët e dyshuar
• Prononcohet deputeti i Merkel: Çështja “Tahiri”, kusht për hapjen e negociatave
• Ministria e Jashtme britanike apel shtetasve të saj: Kujdes në Shqipëri…
• Merkel, Macron dhe May-Trumpit: “Stop” taksave mbi mallrat nga BE
• Arrestohet 30-vjeçari në Parma, posedonte kokainë me vlerë 200 mijë euro
• Telebingo Shqiptare: Çmimi i madh qëndron në Tiranë, makina “Hyundai” shkon në Vlorë
• Sondazhi: Problemi i grekëve, vendosja në pikëpyetje e sovranitetit të tyre
• Emigrantët meksikanë bllokohen në kufi me SHBA
• “300 mjekë të rinj deri vitin tjetër, rritje e cilësisë së spitaleve në rrethe”

Konflikt mes dy të rinjve në Elbasan, shmanget tragjedia Posted: 30 Apr 2018 02:35 AM PDT Një konflikt mes dy të rinjsh në Elbasan për pak sa nuk ka përfunduar në tragjedi, por ndërhyrja e policisë në kohë ka bërë të mundur parandalimin e përshkallëzimit të mëtejshëm të situatës. Uniformat blu janë informuar nga një telefonatë në sallën operative të policisë se, në lagjen “Kala” të Elbasanit po grindeshin dy të rinj, dhe se njëri prej tyre kishte armë zjarri. Shtetasi i identifikuar si Erion Softa, 31 vjeç, që dyshohet se ishte poseduesi i armës së zjarrit tip pistoletë, i cili porsa ka parë policinë është larguar me shpejtësi. Erion Softa, me banim në Elbasan, pas një konflikti për motive të dobëta ka goditur me grusht si dhe ka kërcënuar me pistoletë, shtetasin A.H, 24 vjeç, banues në lagjen “5 Maji”. Ndërkohë, vijon puna për kapjen e shtetasit të shpallur në kërkim, si për gjetjen e sekuestrimit të armës së zjarrit. Materialet do t’i kalojnë Prokurorisë së Rrethit Gjyqësor Elbasan, për veprën penale "Dëmtime të tjera me dashje", "Kanosje" dhe "Prodhimi dhe mbajtja pa leje e armëve të zjarrit". s.a/dita

Vranë pronarin e marketit në Kamëz, gjykata lë në burg dy autorët e dyshuar Posted: 30 Apr 2018 02:22 AM PDT Gjykata e Tiranës ka dhënë masën e sigurisë “arrest me burg” për dy personat që dyshohen si autorë të ngjarjes së rëndë të ndodhur në Kamëz pak ditë më parë, ku mbeti i vrarë Agim Buci. Janë lënë në burg shtetasit Vladimir Kurti, 28 vjeç dhe Ruzhdi Hode, 25 vjeç, të dy banues në Tiranë.                    Agim Buci e Merita Buci Autorët janë përleshur me Agimin në mini-marketin e këtij të fundit, dhe në përleshje e sipër kanë qëlluar me armë. Për pasojë, 53-vjeçari ndërroi jetë, ndërsa bashkëshortja e tij, Merita Buci, mbeti e plagosur në këmbë. E gjithë ngjarja e rëndë ka ndodhur në sy të djalit 6-vjeçar të çiftit. Për identifikimin e autorëve, policia vuri në dispozicion një shumë prej 5 mln lekësh për këdo që ofronte informacion. s.a/dita

Prononcohet deputeti i Merkel: Çështja “Tahiri”, kusht për hapjen e negociatave Posted: 30 Apr 2018 02:11 AM PDT Reporteri i Grupit të CDU-së për Shqipërinë në Parlamentin gjerman, Thorsten Frei, argumenton se negociatat e Shqipërisë me BE-në duhet të hapen vetëm kur gjyqtarët e niveleve të larta të Apelit të kenë kaluar Vettingun. Në një intervistë për “Panorama”, Frei komenton çështjen “Tahiri” dhe thotë se maxhoranca në Shqipëri parandaloi hetimet, duke mos ia hequr plotësisht imunitetin ish-ministrit të Brendshëm. "Po, unë e adresova çështjen "Tahiri" përsëri. Sërish unë nuk mbeta i kënaqur me përgjigjen nga z.Rama. Kundër ish-ministrit të Punëve të Brendshme, Tahiri, ekziston një dyshim i fortë korrupsioni në sajë të informacioneve nga Policia italiane. Meqë shumica e Parlamentit shqiptar nuk kishte dëshirë të hiqte tërësisht imunitetin e Tahirit, hetimet e plota mbi këtë çështje janë parandaluar.” Sipas Freit, procedurat dhe ligjet ekzistuese në luftën kundër korrupsionit dhe krimit të organizuar kundër politikanëve dhe nëpunësve civilë të nivelit të lartë aplikohen me më pak përpikmëri. “Por të gjithë duhet të jenë të barabartë përpara ligjit. Këto çështje vendosin besueshmërinë e të gjitha përpjekjeve të Shqipërisë. Ky është gjithashtu një kriter thelbësor për ne kur flasim mbi kohën e duhur për të hapur negociatat e anëtarësimit," thotë ai. s.a/dita

Ministria e Jashtme britanike apel shtetasve të saj: Kujdes në Shqipëri… Posted: 30 Apr 2018 01:57 AM PDT Mbi 80,000 shtetas britanikë vizitojnë Shqipërinë çdo vit, sipas të dhënave të zyrës së Ministrisë së Jashtme britanike. Shumica e vizitave janë pa probleme, citon kjo zyrë, por për të gjithë britanikët që do të udhëtojnë këtë vit në Shqipëri, zyra e MJB jep disa këshilla. "Monitoroni mediat lokale dhe ndërkombëtare për informacionet e fundit, para se të niseni. Siguria publike në përgjithësi është e mirë, veçanërisht në Tiranë. Krimi dhe dhuna ndodhin në disa zona, por nuk i drejtohen zakonisht të huajve. Pronësia e armëve është e përhapur. Kur vizitoni qytetet kodrinore në kufirin verior me Kosovën, duhet të bëni kujdes dhe t'u vini veshin shenjave paralajmëruese për minat tokësore të pashpërthyera dhe municione të tjera të pashpërthyera. Sulmet terroriste në Shqipëri nuk mund të përjashtohen. Kujdes: “në Shqipëri ka pasur disa raste të mashtrimit me kartë krediti." Kujdes i madh rekomandohet në ngarjen e makinës: “Ngarja mund të jetë shumë e rrezikshme. Mosmarrëveshjet e trafikut mund të përshkallëzohen shpejt, veçanërisht pasi disa shoferë mund të jenë të armatosur. Shmangni reagimin ndaj sjelljeve provokative nga përdoruesit e tjerë të makinave rrugës.” Para Kartat kryesore të kreditit dhe debitit pranohen në shumicën e bankave, supermarketeve të mëdha dhe hoteleve ndërkombëtare. Bizneset e vogla dhe taksitë shpesh pranojnë vetëm para në dorë. Ka ATM të shumta në Tiranë dhe në qytetet kryesore, si dhe zyrat e Exchange-ve ku sterlina, dollarë amerikanë dhe euro janë pranuar gjerësisht. Megjithëse këmbyesit e parave të rrugëve veprojnë hapur, ata e bëjnë këtë në mënyrë të paligjshme. Përdorni vetëm bankat ose zyrat e themeluara të exchange. Ka pasur disa raste të mashtrimit me kartë krediti. Shëndeti Pajisjet mjekësore dhe dentare (përfshirë ato për aksidente dhe emergjenca) janë shumë të varfra, veçanërisht jashtë Tiranës. Sigurohuni që të keni sigurim të duhur shëndetësor dhe fonde të aksesueshme për të mbuluar koston e çdo trajtimi mjekësor jashtë vendit, evakuimin nga ambulanca ajrore dhe riatdhesimi. Uji i rubinetit në Shqipëri mund të shkaktojë sëmundje – duhet të pini vetëm ujë të ambalazhuar. Nëse pini qumësht, sigurohuni që është UHT (i pasterizuar).   Fatkeqësitë natyrore Shqipëria qëndron në një zonë sizmikisht aktive dhe dridhjet janë të zakonshme. Tërmetet serioze janë më pak të shpeshta, por mund të ndodhin.   Vizat Qytetarët britanikë mund të hyjnë dhe të qëndrojnë në Shqipëri për një maksimum prej 90 ditësh në çdo periudhë 6-mujore pa vizë. Autoritetet shqiptare kërkojnë që dikush që qëndron më shumë se 90 ditë të aplikojë në një stacion lokal të policisë për një leje qëndrimi. Pasaporta juaj duhet të jetë e vlefshme për një periudhë minimale prej 3 muajsh nga data e hyrjes në Shqipëri.   Ligjet dhe zakonet lokale Anglishtja nuk flitet gjerësisht, por gjithnjë e më shumë flitet nga të rinjtë. Homoseksualiteti dekriminalizohet. Legjislacioni kundër diskriminimit dhe anti-urrejtjes është në fuqi. Tirana ka disa bare miqësore për homoseksualët dhe një numër grupesh mbështetëse LGBT. Dënimet për krimet e lidhura me drogën janë të rënda. Autoritetet shqiptare jo gjithmonë e informojnë Ambasadën Britanike kur shtetasit britanikë janë arrestuar. Nëse jeni të paraburgosur, ju mund të këmbëngulni për të drejtën tuaj për të kontaktuar një punonjës konsullor britanik.   Terrorizëm Sulmet terroriste në Shqipëri nuk mund të përjashtohen. Sulmet mund të jenë pa dallim, duke përfshirë vendet e vizituara nga të huajt. Terroristët mund të synojnë vendet fetare, duke përfshirë kishat. Ka një kërcënim të rritur të sulmit terrorist globalisht kundër interesave të Mbretërisë së Bashkuar dhe shtetasve britanikë nga grupe ose individë të motivuar nga konflikti në Irak dhe Siri. Ju duhet të jeni vigjilent në këtë kohë.   Siguria dhe mbrojtja Siguria publike në përgjithësi është e mirë, veçanërisht në Tiranë dhe shqiptarët janë shumë mikpritës për vizitorët. Krimi dhe dhuna ndodhin në disa zona, por raportet e krimit që synojnë veçanërisht të huajt janë të rralla. Ka pasur raste të shtënash dhe shpërthime të vogla, por këto duket të jenë të lidhura me mosmarrëveshjet e brendshme mbi interesat kriminale, afariste apo politike.   Minat tokësore Në dhjetor të vitit 2009, Shqipëria zyrtarisht deklaroi se kishte përmbushur detyrimet e saj të "Konventës së Otavës 5" dhe kishte arritur statusin e minave. Sidoqoftë, kur vizitoni qytetet kodrinore në kufirin verior me Kosovën, duhet të kujdeseni, veçanërisht nëse ecni dhe ndiqni shenjat paralajmëruese për minat tokësore të pashpërthyera dhe municione të tjera të pashpërthyera. Është duke u zhvilluar de-minimi në anën e Kosovës.   Udhëtimi në rrugë Ngarja mund të jetë shumë e rrezikshme. Rrugët janë të varfra, veçanërisht në zonat rurale. Ndriçimi i rrugëve në zonat urbane është subjekt i ndërprerjeve të energjisë elektrike. Diku tjetër, madje edhe në rrugët kryesore arteriale ndër-urbane, nuk ka ndriçim rrugor. Nëse jeni duke udhëtuar natën, kini kujdes për punimet e pa shënuara të rrugëve, gropat dhe automjetet e pa ndezur. Ngarja shqiptare shpesh mund të jetë agresive dhe e çrregullt. Vdekjet nga aksidentet e trafikut rrugor janë ndër më të lartat në Evropë. Policia ka marrë disa masa për të ulur numrin e aksidenteve. Mosmarrëveshjet e trafikut mund të përshkallëzohen shpejt, veçanërisht pasi disa shoferë mund të jenë të armatosur. Shmangni reagimin ndaj sjelljeve provokative nga përdoruesit e tjerë të makinave rrugës. Nëse jeni përfshirë në një aksident trafiku, madje edhe një i mitur, ju duhet të prisni derisa policia të mbërrijë. Kjo zakonisht do të ndodhë shpejt në zonat urbane. Nëse keni ndërmend të importoni një automjet në Shqipëri, sigurohuni që të keni të gjitha dokumentet e nevojshme pas mbërritjes në kufi. Konsultohuni me Ambasadën Shqiptare në Londër para se të largoheni. Ambasada Britanike nuk do të jetë në gjendje të ndihmojë askënd që përpiqet të sjellë një automjet në Shqipëri pa dokumentet e duhura. Rekomandohet një leje për vozitje ndërkombëtare (IDP).   Udhëtimi ajror Shoqata Ndërkombëtare e Transportit Ajror publikon një listë të kompanive ajrore të regjistruara që janë audituar dhe përmbushin një numër standardesh të sigurisë operative dhe praktikave të rekomanduara. Kjo listë nuk është e plotë dhe mungesa e një linje ajrore nga kjo listë nuk do të thotë domosdoshmërisht se është e pasigurt. Në vitin 2014, Organizata Ndërkombëtare e Aviacionit Civil bëri një auditim të nivelit të zbatimit të elementeve kritike të mbikëqyrjes së sigurt në Shqipëri.   Udhëtimi në det Ekzistojnë disa raporte të shtypit lokal që anijet që janë marrë me qira përgjatë brigjeve mund të kenë mungesë të masave paraprake dhe pajisjeve të sigurisë. Agjencia Kombëtare e Mjedisit në Shqipëri raportoi në vitin 2016 se 83% e plazheve në Shqipëri janë të një standardi shumë të mirë apo të mirë, por raporti ngriti shqetësime mbi një numër të vogël plazhesh, duke përfshirë plazhet në Durrës, Vlorë dhe Sarandë të cilat janë të ndotura si rezultat i largimit jo të duhur dhe të ujërave të zeza.   Situata politike Dy partitë kryesore të opozitës mbajtën një demonstratë të madhe në Tiranën qendrore më 27 janar 2018. Më 31 mars, një demonstratë në autostradën e Kukësit u kthye në një përleshje dhune midis protestuesve dhe policisë. Protesta të mëtejshme në shkallë të gjerë janë të mundshme. Ju duhet të kontrolloni mediat lokale për informacionet e fundit, të mbeteni vigjilentë dhe të shmangni çdo demonstrim. Tensioni ndërmjet grupeve fetare dhe shprehja e pikëpamjeve ekstremiste është shumë e rrallë. Qëndrimet ndaj vendeve perëndimore janë jashtëzakonisht pozitive./monitor s.a/dita

Merkel, Macron dhe May-Trumpit: “Stop” taksave mbi mallrat nga BE Posted: 30 Apr 2018 01:43 AM PDT Angela Merkel, Emmanuel Macron dhe Theresa May, i kanë kërkuar Shteteve të bashkuara të Amerikës që të mos vendosë taksa mbi mallrat nga BE, përndryshe unioni do të kalojë në mbrojtje të interesave të tij. Pozicioni i përbashkët është arritur gjatë një bisede telefonike mes këtyre tre lidërve, sikurse citohet nga mediat ndërkombëtare zëdhënësi i qeverisë gjermane. Presidenti amerikan Donald Trump ka vendosur tarifa prej 25 përqind mbi importet e hekurit dhe 10 përqind mbi ato të aluminit, por e ka përjashtuar BE nga masa deri më 1 maj, duke rezervuar të drejtën për të marrë një vendim brenda 12 majit. Ndërsa për sa i takon Iranit, Franca, Gjermania dhe Britania e Madhe mbështesin marrëveshjen bërthamore me republikën islamike, duke e quajtur mënyrën më të mirë për të penguar Teheranin të prodhojë armë bërthamore. Të tre liderët janë edhe për amendimin e  tekstit të marrëveshjes, duke e zgjeruar përmbajtjen dhe duke mos e përjashtuar mundësinë e një marrëveshjeje të re. Ndërkohë, presidenti i Iranit, Hassan Rouhani, mësohet t’i ketë thënë presidentit francez Macron se, marrëveshja bërthamore nuk është e negociueshme. Sipas presidencës iraniane, vendi nuk do të pranojë asnjë kufizim që shkon përtej angazhimeve të tij të marra më herët. s.a/dita

Arrestohet 30-vjeçari në Parma, posedonte kokainë me vlerë 200 mijë euro Posted: 30 Apr 2018 01:29 AM PDT Një shqiptar është arrestuar për shpërndarje të lëndëve narkotike në Fidenza të Parmas. 30-vjeçari, identiteti i të cilit nuk është bërë ende i ditur, punonte si kamarier. Ai prej disa kohësh vëzhgohej nga policia, sepse dyshohej nga disa banorë se ai vidhte dhe mashtronte të moshuarit. Për këtë arsye, të dielën autoritetet u vunë në ndjekje të makinës së tij tip “Passat”. Pasi konstatoi se po ndiqej nga disa makina, shqiptari 30-vjeçar mundohet të ndryshojë drejtim. Duke lënë më pas makinën, ai mundohet të arratiset në këmbë, por duke qenë se rrugët ishin të bllokuara nga forcat policore, ai iu dorëzua këtyre të fundit. Gjatë kontrollit personal, agjentët i gjetën 30-vjeçarit një dozë të vogël kokaine të fshehur në pantallona. Sipas mediave italiane, kontrolli vijoi imtësisht edhe në makinën e shqiptarit, ku në bagazh u zbulua një modifikim i dyshimtë. Pas çmontimit të bagazhit u arrit të zbulohej një ndarje që kishte krijuar shqiptari, ku kishte fshehur dy pako me kokainë, që peshonin 2 kilogramë e 100 gramë. Dhe nëse do të dilte në treg, kokaina do të kishte një vlerë prej 200 mijë eurosh. s.a/dita

Telebingo Shqiptare: Çmimi i madh qëndron në Tiranë, makina “Hyundai” shkon në Vlorë Posted: 30 Apr 2018 01:25 AM PDT   Shorti 29 Prill 2018 Nuk kanë të ndalur fituesit e çmimeve të mëdha në lojën më popullore të fatit në vend, Telebingo Shqiptare. Shorteu special i ditës së djeshme ka gëzuar me çmime mijëra familje shqiptare. Çmimi i madh i javës, si dhe makina "Hyundai", ishin vetëm dy ndër surprizat që janë fituar dje. Gjithçka ka nisur me lojën telefonike. Duke shëtitur në shumë qytete të vendit, loja telefonike ka shpërndarë çmime të shumta për të gjithë të përzgjedhurit që i janë përgjigjur në mënyrë korrekte telefonatës "surprizë", që Telebingo ka bërë në shtëpitë e tyre. Përzgjedhja rastësore e kontrabiletave ka shpallur si fitues të parë të lojës, Adriatikun në kryeqytet, të cilit fati i ka ecur më së miri. Kjo pasi në përzgjedhjen e dy zarfeve më të preferuara, ai është shpallur fitues i shumës prej 50,000 lekësh. Një tjetër fitues në kryeqytet ka vijuar të luajë me dhuratat dhe çmimet e Telebingo Shqiptare. Me mbajtjen e dy zarfeve më të preferuara, Enedi është shpallur fitues i shumës prej 35,000 lekësh. Fati i ka buzëqeshur më së miri edhe të përzgjedhurës së radhës si fituese, po në kryeqytet. Me mbajtjen e dy zarfeve më të preferuara, si dhe shansin e dhënë "2 herë fat", Natasha ka siguruar nga Telebingo Shqiptare shumën prej 70,000 lekësh. Klausi në Korçë ka vijuar të luajë më tej me çmimet e Telebingos, ku dhe është shpallur fitues i shumës prej 50,000 lekësh. Drita ishte fituesja e fundit që ka tentuar të gjejë se në cilin prej zarfeve fshihej makina. Ndonëse nuk ka qëlluar në shenjë këtë çmim, ajo i është gëzuar 2 orëve të ofruara si dhuratë nga mbështetësit financiarë të programit, si dhe shumës prej 40,000 lekësh. Telebingo ka vijuar më pas me shorteun e goglave për çmimin e madh të javës që ka kapur vlerën e 2,100,600 lekëve. Seria e numrave të përzgjedhur ka treguar se çmimi i madh për këtë javë do të qëndrojë në kryeqytet, ku dhe rezulton të jetë blerë bileta fituese. Shorti i goglave ka përzgjedhur edhe mijëra fitues të tjerë nëpërmjet serisë së fituesve me një linjë dhe dy linja. Konkretisht, janë shpallur si fitues të 50 lekëve 27407 lojtarë. Fitues të serisë me dy linja janë shpallur 522 persona të tjerë, ku secili prej tyre siguron nga Telebingo Shqiptare shumën prej 1,520 lekësh. Fitues të një bilete janë shpallur edhe të gjitha ata persona që kanë numrin 0, të përcaktuar si numër fati në biletën e tyre. Argëtimi nëpërmjet tingujve të muzikës ka vijuar me përzgjedhjen e fituesve të tjerë. Konkretisht bëhet fjalë për 10 fituesit e çmimit prej 1 milionë lekësh (të vjetra). Ndërkohë që në fund është përzgjedhur edhe fituesi i çmimit të lakmuar, makinës "Hyundai", e cila është fituar nga Hasani në qytetin e Vlorës. Fituesit e shorteut të djeshëm mund të paraqiten mesditën e së mërkurës në zyrat e Telebingos për të tërhequr dhuratat dhe çmimet e fituara. e.k/dita

Sondazhi: Problemi i grekëve, vendosja në pikëpyetje e sovranitetit të tyre Posted: 30 Apr 2018 01:15 AM PDT Tendenca e Turqisë për të vënë në pikëpyetje sovranitetin kombëtar grek është problemi më i madh me të cilin po përballet Greqia në marrëdhëniet e saj me fqinjët, dhe kjo vjen si konkluzion i një sondazhi mbarëkombëtar të kryer nga instituti "Public Issue" me temën  "Greqia dhe Bota 2018". Gazeta “Ekathimerini” citon se sipas anketës, 74 përqind e të intervistuarve thanë se sfida ndaj sovranitetit grek në Egje dhe mbi ishujt si, Kastelorizo, Fourni dhe Dodekanez, është çështja më e rëndësishme, ndërsa 16 përqind besojnë se shkak është agresioni dhe papërgjegjshmëria e Turqisë. Të pyetur se ku gjenden marrëdhëniet greko-turke në krahasim me një vit më parë, 81 përqind thanë se janë përkeqësuar, 16 përqind thanë se janë të njëjta dhe vetëm 2 për qind besojnë se ato janë përmirësuar. Lidhur me trajtimin e marrëdhënieve dypalëshe me Turqinë nga qeveria greke, 54 përqind e të anketuarve dhanë përgjigjen "ndoshta e gabuar", kundrejt 37 përqind që e vlerësojnë "ndoshta të saktë". Në të njëjtën kohë, 56 përqind e pjesëmarrësve thanë se kritikat e ngritura nga opozita kundër qeverisë mbi politikën e saj ndaj Turqisë janë "ndoshta të gabuara", ndërsa 32 përqind thanë se "ndoshta janë të sakta". Sondazhi ka treguar se 67 përqind e të anketuarve janë "kundër" anëtarësimit të Turqisë në Bashkimin Evropian dhe 27 përqind janë "në favor". Megjithatë, shumica dërrmuese, 70 përqind, thotë se Greqia duhet të vazhdojë të angazhohet në dialog dhe negociata me Turqinë, ndërsa vetëm 28 përqind janë kundër bisedimeve. Të pyetur nëse ata besojnë se një luftë me Turqinë është e mundshme në vitet në vijim, 52 përqind thanë se është "e pamundur" dhe 44 përqind thanë se është "e mundshme". s.a/dita

Emigrantët meksikanë bllokohen në kufi me SHBA Posted: 30 Apr 2018 12:57 AM PDT 150 emigrantë meksikanë janë penguar të hyjnë në Shtetet e Bashkuara të Amerikës. Zyrtarë amerikanë të kufirit thanë se këto persona, shumica e të cilëve udhëtonin me fëmijë, gjendeshin në kalimin kufitar mes Meksikës dhe SHBA-së në afërsi të San Diegos. Nuk është bërë ende e ditur nëse emigrantët nga Hondurasi, Guatemala dhe El Salvadori do të lejohen të hyjnë më vonë apo do të kthehen pas. Presidenti Donald Trump thotë se ky karvan njerëzish është një kërcënim për sigurinë e Shteteve të Bashkuara, dhe për këtë arsye, ai ka premtuar se do të dërgojë ushtrinë për të siguruar kufirin jugor të vendit me Meksikën. Një nga organizatorët e udhëtimit, tha për BBC se asnjë në grup nuk i ishte nënshtruar procedurave zyrtare në doganën amerikane. Sipas Alex Mensing, rreth 50 persona janë ende në radhë për të marrë lejen e hyrjes ndërsa rreth 100 të tjerë po presin në anën meksikane të kufirit. Zyrtarët thanë se në pikën e kalimit San Ysidro është arritur kapaciteti maksimal dhe individët duhet të presin në Meksikë, teksa oficerët punojnë për të përfunduar procedurat e nevojshme për ata që kanë kaluar. Bëhet fjalë për një grup azilkërkuesish, pjesa më e madhe e tyre nga Hondurasi. Ata u nisën drejt SHBA, më 25 mars, nga Meksika jugore, afër kufirit me Guatemalën. Grupi ka udhëtuar me autobusë, tren dhe më këmbë gjatë rrugëtimit të tyre prej 3200 km deri në kufirin amerikan, dhe shumëkush në grup thotë se po largohet nga persekutimi dhe dhuna në vendin e tyre. s.a/dita

“300 mjekë të rinj deri vitin tjetër, rritje e cilësisë së spitaleve në rrethe” Posted: 30 Apr 2018 12:45 AM PDT Kryeministri Edi Rama ka vendosur që këtë javë ta nisë me punësimin e 37 mjekëve specialistë, të cilët kanë zgjedhur të punojnë në spitalet rajonale të vendit. Përmes një postimi në rrjetin social “Facebook”, kryeministri Rama shkruan se punësimi i 300 mjekëve të rinj deri vitin tjetër, do të sjellë rritje në numrin dhe cilësinë e shërbimeve. Postimi i plotë MIRËMËNGJES  dhe me shembullin e Dr. Albanit, një nga 37 mjekët e rinj specialistë që në vend të kryeqytetit kanë zgjedhur të punojnë në spitalet rajonale të vendit, ju uroj një ditë të mbarë  Punësimi i 300 mjekëve të rinj deri vitin tjetër në mbarë vendin, do të sjellë një rritje të ndjeshme të numrit e cilësisë së shërbimeve të specializuara që ofrohen për qytetarët në të gjitha spitalet tona  s.a/dita

You are subscribed to email updates from Gazeta Dita. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States

loading...

Lexo edhe: