Dikush ka një ëndërr të shëmtuar, ndërsa unë kam një frikë të bukur.
Unë kam një mendim të varfër, kurse dikush ka frikë për të menduar.
Dikush ka para, ndërsa unë nuk kam vetëm të holla.
Unë kam begati të ngjeshur, kurse dikush ka tufë dëshirash.
Dikush ka makinë luksoze, ndërsa unë kam një qëllim të mirë.
Unë kam vullnet, kurse dikush ka vetëm oreks.
Dikush ka emër me nam, ndërsa unë kam emër me mbiemër.
Unë kam rroba që i përdori, kurse dikush ka lakuriqësi të papërdorshme.
Dikush ka zemër që pompon gjakun, ndërsa unë kam shpirt për të dashuruar.
Unë kam këmbë për të ecur, kurse dikush ka këmbë për të shqelmuar.
Dikush ka fytyrë të bukur, ndërsa unë kam një fytyrë njëfytyrëshe.
Unë kam prindër të edukuar, kurse dikush ka prindër të pashëm.
Dikush ka fëmijë për të lozur, ndërsa unë kam lodra për fëmijë.
Unë kam grua për ta arsyetuar jetën, kurse dikush ka jetë për t’i joshur gratë.
Dikush ka moral për shitje, ndërsa unë kam material për të të dhënë falas.
Unë kam ca fjalë për t’i bërë fjali, kurse dikush ka fjali vetëm për mahi.
Dikush ka ndikim në shoqëri, ndërsa unë kam shoqëri me ndikim për mbarësi.
Unë kam miqësi me miq, kurse dikush ka armiqësi me miqtë.
Dikush ka asgjë, ndërsa unë kam pakgjë.
Unë kam Zotin, pastaj veten dhe dashamirët, kurse dikush ka vetëm fantazinë!
Iljasa SALIHU
loading...
Lexo edhe:
