“Itali, gjenden 26 mijë bimë kanabis të organizatës “Ndrangheta”” plus 9 more - Gazeta Dita |
- Itali, gjenden 26 mijë bimë kanabis të organizatës “Ndrangheta”
- Sulmi me thikë në Gjermani, policia: S’ka lidhje me terrorizmin
- Revolucion në Seria A, kampionati italian tani edhe në teatër e kinema
- Performanca e shtetit online, OKB: Shqipëria e 74-ta në botë, nivel i lartë
- Në gjendje të dehur dëmton makinën e policisë, arrestohet 44-vjeçari në Skrapar
- Letra e Eqrem Çabejit dhe poema e Lasgush Poradecit
- Arben Derhemi: Dua medoemos një Teatër Kombëtar të rindërtuar nga e para
- Video/ Kreu i PD në Gramsh kërcënon policët: Mbajeni mend çfarë do ju bëj
- Fundi i WikiLeaks, Ekuadori do t’ia dorëzojë Julian Assange Britanisë
- Këputja nga vapa dhe goditja nga dielli, shenjat si t’i dalloni
Itali, gjenden 26 mijë bimë kanabis të organizatës “Ndrangheta” Posted: 21 Jul 2018 02:26 AM PDT Tre plantacione, për një total prej 26 mijë bimë kanabis sativa, janë zbuluar nga Policia e Shtetit në Itali gjatë hetimeve që çuan në operacionin "Kopshte Sekrete". Nëse lënda narkotike do të shitej në treg, vlera e saj do të shkonte rreth 20 milionë euro. Hetimet që rezultojnë nga konfiskimi dhe që u zhvilluan në Nicotera, Joppolo dhe Capistrano, kanë theksuar aftësinë e organizatës për të siguruar të gjitha fazat e ciklit të prodhimit. Policia italiane njofton se në kuadër të këtij operacioni, ka goditur një organizatë të rrezikshme kriminale të narko-trafikut, e cila drejtohej nga Emmanuele Mancuso, djali i njërit prej kapove të organizatës famëkeqe kalabreze "Ndrangheta" në Limbadi Pantaleone, i quajtur ndryshe "inxhinieri", raporton shtypi italian. Tetë persona kanë përfunduar në pranga, ndërsa nëntë të tjerëve u është caktuar masa e sigurisë 'arrest shtëpiak'. o.j/dita |
Sulmi me thikë në Gjermani, policia: S’ka lidhje me terrorizmin Posted: 21 Jul 2018 02:08 AM PDT Një sulm me thikë në një autobus në Lubecck të Gjermanisë një ditë më parë la 14 persona të plagosur. Ndërkohë policia vuri në pranga autorin e ngjarjes së rëndë, e ndërsa ka bërë të ditur se 30-vjeçari nuk ka lidhje me radikalizimin. Autori i sulmit është identifikuar si një person me origjinë nga Irani. Megjithatë, policia gjermane nuk ka dhënë detaje të tjera në lidhje me ngjarjen. o.j/dita |
Revolucion në Seria A, kampionati italian tani edhe në teatër e kinema Posted: 21 Jul 2018 01:53 AM PDT Revolucion i vërtetë pritet që të ndodhë në Itali në lidhje me të drejtat televizive të Serie A, një risi e aprovuar nga asambleja e Federatës Italiane të Futbollit. Duke filluar nga ky sezon, ndeshjet e Serie A mund të transmetohet drejtpërsëdrejti edhe në kinema e teatro, të cilat duhet të jenë të pozicionuara rreth 80 kilometra larg stadiumeve. Kjo nismë ndërmerret për të tërhequr sa më shumë spektatorë, edhe ata që nuk janë të abonuar në Sky e DAZN. Kinematë do të jenë kryesisht ato të zinxhirëve të mëdhenj, por mund mos të përjashtohen edhe ato më të voglat, nëpër lagje, por edhe teatrot. Do të nevojiten disa karakteristika teknike për të garantuar transmetimin sipas standardeve të parashikuara nga Liga e Futbollit. o.j/dita |
Performanca e shtetit online, OKB: Shqipëria e 74-ta në botë, nivel i lartë Posted: 21 Jul 2018 01:42 AM PDT Organizata e Kombeve të Bashkuara ka publikuar një raport të zgjeruar për qeverisjen elektronike, pra shërbimet publike të qytetarëve të cilat mundësohen elektronikisht, duke shmangur radhët e gjata dhe humbje kohe të pakuptimta. Raporti përfshin edhe një indeks, ku analizon 192 vendet anëtare të Organizatës së Kombeve të Bashkuara. Shqipëria renditet në vendin e 74-të në botë, ndër këto 192 vende,duke u klasifikuar në vendet me një nivel të lartë. Ndërkohë që në rajon, Serbia dhe Mali i Zi kanë një renditje më të mirë se ne. Maqedonia dhe Bosnje Hercegovina ndërkohë kanë një renditje më të keqe, shkruan scan tv. Por, në nën-indikatorët që i referohen shërbimit online, Shqipëria është në vend të parë në rajon, me pikë të barabarta me Serbinë, gjithashtu në vend të parë. Vendet e tjera ndërkohë kanë një performancë bindshëm më të dobët në këtë drejtim. Shqipëria dështon kështu në komponentin që i referohet infrastrukturës së telekomunikacionit. Sa i përket një tjetër indikatori ndërkohë, atij të pjesëmarrjes në këto shërbime, Shqipëria renditet e 59-ta në botë, më keq vetëm se Serbia në rajon. Raportin e plotë mund ta lexoni KETU
o.j/dita
|
Në gjendje të dehur dëmton makinën e policisë, arrestohet 44-vjeçari në Skrapar Posted: 21 Jul 2018 01:28 AM PDT Policia e Skraparit ka vënë në pranga një 44-vjeçar, i cili në gjendje të dehur ka dëmtuar një automjet policie. Policia bën të ditur se personi i arrestuar është shtetasi Hamit Duro. Sipas policisë, 44-vjeçari ka dëmtuar mjetin e policisë tip "Volkswagen" që ishte i parkuar, ndërsa ka kundërshtuar punonjësit e policisë për të shmangur shoqërimin. o.j/dita |
Letra e Eqrem Çabejit dhe poema e Lasgush Poradecit Posted: 21 Jul 2018 01:24 AM PDT Moikom Zeqo (Nga arkivi i Thoma Kacorrit) Ne kryeqytetin e Sofias ne Bullgari ne 20 prill 2002 jam takuar me shkrimtarin dhe dijetarin Thoma Kacorri, i cili me ftoi edhe ne shtepine e tij . Aty me tregoi arkivin e tij shumevjecar, plot materiale te pabotuara, qe lidhen me histtorine kulturore te shqiptareve te Rilindjes Kombetare ne shekullin e XIX dhe me pas. Thoma Kacorri me dhuroi edhe faksimilet e dy dokumtave te rendesishem, ate te nje letre qe i kishte derguar gjuhetari i madh Eqrem Cabej ne 1967, si dhe nje poeme te hereshme, te panjohur te Lasgush Poradecit, te botuar ne 1923. Po i bej publike per here te pare, keto dy dokumenta, te arkivit te Thoma Kacorrit, i cili ka vite, qe ka mbyllur syte, por une, nuk mund te harroj kurre, mikepritjen e tij ,proverbiale, ne Sofie dhe miresine, per te me dhene dokumentet ne fjale. *** LETRA E EQREM CABEJIT PER THOMA KACORRIN Tiranë, më 19.2.1967 I nderuar Koleg, i dashur mik! Që kur u kthyesh prej Bullgarie, me ato kujtimet e bukura, që mora së andejmi, kam dashur të Ju shkruaj e të Ju falemnderit edhe me shkrim për pritjen miqësore, që Ju personalisht më bëtë gjatë ditvet të Sofjes. Gjeta atëhere disa punë , që duheshin kryer ngutësisht këtu. Desha pastaj të Ju shkruaja me rastin e vitit të ri, për të Ju uruar shëndet, suksese në punë e gjithë të mirat, po përsëri erdhën disa punë në mes. Prandaj së pari Ju lutem për vonesën e përgjegjes letrës Suaj më datë 30.XI., të vitit të kaluar. Mendimi Juaj qe Urdini jezera, Urdina reka në malet e Riles te kenë të bëjnë me shq.hurdhë, duke marrë parasysh që atje pranë ka dhe një toponim Malovica, duket të jetë afër menç – me gjithë se nuk përjashtohet mundësia që aty të përmbahet rum.urda "djathe" e qe te kemi te bejmë me një stan djatharësh rumunë dikur në ato anë (dihet se Jireceku e të tjerë dijetarë kanë vënë në dukje toponimet rumune në Bullgari). Sa për shq.hurdhë, Gustav Meyeri në Fjalorin etimologjik 154 e le të pashpjeguar, po e rijep dhe ne Alb.Studien III 32. Jokli, Studien zur alb. Etymologjie und ortbildung 30 v., 89 e 97 e vendon te rrenja indoevropiane uer-,ur – "i laget", sh. Dhe Walde-Pokornyr i 268. Ribezzo, Rivista d'Albania i,II (1940) 124 shën.2 e afron me lituanishten skardua "i repjeta". Fjala shfaqet në shqipen për herë të parë te Fjalori i Blankut (Bardhit) f.82. dhe vetë nuk kam ardhur në një përfundim për punën e burimit të saj. Ju lutem të më drejtoheni pa kursim e çdo herë që Ju duhet ndonjë sqarim lidhur me ndonjë çështje të shqipes. Më vjen keq që këtë herë nuk jam në gjendje të Ju jap sqarime të plota, por edhe për këtë çështje jam përsëri në dispozicionin Tuaj. Zojushes sonë Sokolova. Mbetem me të falat më të përzemërta për Ju dhe Familjen Tuaj, edhe nga ana e sime shoqeje. Me rast lutem u jepni të falat e mia shokëve të Ambasadës sonë në Sofje. /Eqrem Çabej *** LASGUSH PORADECI, POEMA E TIJ KËNGA E "SHQIPËRISË SË RE" (Koh e shkuar në Vllahi) Koh" e shkuar në Vllahi Ishte larë me flori Se luftonin veç për ti, Veç për famë e madhëri. Shqipëri moj Shqipëri
Mun në qëndren e Vllahisë, Në qytet të Bukureshtit, Mbiri zëri i Shqipërisë Si zëmbak në mes të sheshit. Mbiu atje ku politika Nuku dij ç'ësht helm- i gjakut, Ku shëndriu Elenë Gjika E Kuvendi i Naço-Plakut, Ku i mblodhi porsi dhentë Bijtë e tij Tërpo-Vasili, Ku këndoi Naim-i shenjtë Dukë thirrur si bilbili.
O! moj kohërat e arta! O! moj zembërzat e dlira Me ç'gëzim ju shkruan karta
Kur ja sheh nër shoqërira: Drita-plakë e Diturija E Bashkimi edhe Shpresa; Edhe Liria e Shoqërija E Sofia Mbretëresha… Cilado sa mund m'ë mirë, Sa m'e zjarrtë cilado; E nër to gjith një dëshirë, Gjith një shpresë nëpër to- …S'rron-o! jo, njeriu i urtë, se kështu pat thënë Zoti, Prandaj vdes me shpirt të gurtë Edhe humb si pikë loti; Humbi pra dh'Elenë Gjika, Humbi fjal e Naço Plakut, Pa zu prapë politika, Zu të rrjedhë lumi-i gjakut: Atëhere i ndolli dhentë Dh'e bekoj Tërpo Vasili… Fluturoj Naimi-i shentë Duke qarë si bilbili.
O! moj kohërat e arta O! moj zembërzat e dlira! Me ç'të zi ju shkruan karta Ndaj s'u sheh nër shoqërira. Ju kaluat porsi hije Kur shndrriu në terr në shkretë.
O! moj zemra shentërijë Që më s'ini-atje ku qetë Ah! Q'aherë zu të shtrijet Rëndë-e keq linçoj i zisë, Po ka nxirë vetëdijet Me çdo vend të Rumanisë Dh'e u helmua Shqipëtari, E vajtoj prapë prej së qari Uturiu gjith Bukureshti.
O! moj kohërat e arta O! moj zembërzat e dlira! Se me ç'mall ju shkruan karta Nër këto vështirësira.
Sepse ja, në dhe të huaj, Një fletore zu të nisë, Që të jetë zëri juaj Edhe zëri i Shqipërisë Zu të nisë duke dalë "Shqipërijeza e Re": Kur bën fjalë me ngadalë… Kur godet porsi rrufe… Sepse kjo'sht'-!udh" e mbarë E ndërgjegjes së kulluar: Duke ngarë e duke sharë, Edhe duke përgjëruar E kështu shkoj mot- i dytë E si-i treti u pat vdarë Mot i katërt mbylli sytë Që sot nis një mot i ri, As t'u flakeshim o Zot! Qajmë, o-nënë Shqipëri, Qajmë., – e derdhim pika lot.
Shqipëri! Moj nëna jime: Më ke rritur me thërime.
Shqipëri! Të qofsha falë Të kam nënë, më ke djalë. (E botuar fillimisht në organin "Shqipëria e Re" Konstancë ,Rumani, 29 korrik 1923, e zgjodhi BAKI YMERI)
|
Arben Derhemi: Dua medoemos një Teatër Kombëtar të rindërtuar nga e para Posted: 21 Jul 2018 01:04 AM PDT Aktori Arben Derhemi ka dhënë sot një prononcim për median, duke ripërsëritur atë që gjithmonë ka qenë dëshira e tij: ndërtimin e një teatri të ri kombëtar. Ai ka shprehur nevojën për të pasur dosmosdoshmërisht një godinë të rindërtuar nga e para. “Do doja një teatër të ri, medoemos edhe Teatër Kombëtar të rindërtuar nga e para”, është shprehur ai për "Koha Jonë". Të njëjtin mendim ka shprehur edhe aktori Genc Fuga, i cili shkon më tej duke theksuar nevojën e një teatri të ri që do të përmbushte kushtet e domosdoshme për vënien në skenë të shfaqjeve. Fuga thotë se spektatori duhet të ndihet “i përkëdhelur”, kur ndan ato dy orë të jetës së tij me regjisorët e aktorët. “Ndërtimin e Teatrit të Ri e mendoj të mbështetur në aspektin ligjor në një Kompleks me më shumë salla e kapacitete 800 e 300 vendëshe, duke paraprirë rritjen demografike të popullsisë, me gjithë ambientet ndihmëse e administrative, me restorant e bare, me lozha, e teknikën më të fundit skenike. Pra, spektatori duhet të ndihet “i përkëdhelur”, kur ndan ato 2 orë të jetës së tij me Regjisorët e Aktorët! Çdo mënyrë tjetër, do të cenonte misionin e Teatrit dhe do të na çonte në “bienale” të tjera, larg Memories Kombëtare të Publikut!”, nënvizon Fuga. o.j/dita |
Video/ Kreu i PD në Gramsh kërcënon policët: Mbajeni mend çfarë do ju bëj Posted: 21 Jul 2018 01:00 AM PDT Është publikuar video e kërcënimit që kryetari i degës së PD-së në Gramsh, Elmaz Haruni iu ka bërë efektivëve të policisë që e ndaluan dje në gjendje të dehur dhe duke kundërshtuar policinë e Shtetit. Në videon e publikuar nga Report Tv, duket Haruni, në një irritim me policët. Ai ofendon dhe kërcënon uniformat blu. Gjatë konfliktit, nuk kanë munguar shprehjet banale dhe paralajmërimet e herëpashershme se Elmaz Haruni nuk është qytetar i thjeshtë por është kryetar i PD-së në Gramsh. Ditën e djeshme, Partia Demokratike dhe deputeti Luçiano Boçi ngritën shqetësimin se Policia e Shtetit kishte ndaluar padrejtësisht Elmaz Harunin, për mosvënie të rripit të sigurimit. Deputeti Boçi akuzoi Policinë e Shtetit për një arrestim politik. “Ditën e zhvillimit të Aktivit të degës së Partisë Demokratike, me pretekstin e mosvënies së rripit të sigurimit, policia private e Edi Ramës dhe Fatmir Xhafajt arreston Kryetarin e PD Gramsh Elmas Harunin dhe sekretarin organizativ të kësaj dege. Ky është një arrestim i pastër politik dhe dëshmi e dorëzimit të policisë para krimit dhe trimërimit të saj pa arsye para qytetarit.”-tha Boçi në emër të PD. Më poshtë mund të lexoni të zbardhur të plotë momentet kur kreu i PD-së Gramsh, kundërshton policët. Debati i plotë: Qytetar: Qetësohu, o qetësohu Kryetari i PD-së në Gramsh: Me këta by*q*ra je dhe ti? Polici: Të lutem zotëri me fjalorin Kryetari i PD-së në Gramsh: Mbaje mend Tomorr Rama, kaq të them, mbaje mend, çkam për të punuar. O by*qi*ra o hashashxhinj. Sekretari organizativ i PD-së në Gramsh: Më the ndalo, ndalova Kryetari i PD-së në Gramsh: Hape mo derën se plasa, o ju qi*sha motrën! Hape derën! A ju q*sha motrën! A ro*t!. Mbaje mend ti! Ti, ti o by*q*r… Qytetari: O xha Elmaz, këtu se po flasim bashkë… Kryetari i PD-së në Gramsh: Ik ere mbushu Shoferi: Nuk të takon të mbash çelësin. Kryetari i PD-së në Gramsh: Ça ke moj zonjë? Hape derën të dal o burrë…Kemi gjë drogë? Polici: Asgjë Kryetari i PD-së në Gramsh: Ça kemi brenda? Ndalon kryetarin e PD-së së Gramshit, ça ke? Polici: Ju lutem qetësohuni. Unë s'di gjë fare, unë duhet të bëj detyrën. Kryetari i PD-së në Gramsh: Ej, shëno aty! Kryetari i Partisë Demokratike, ndalohet si person…pse qarkullon Polici: I pirë. Kryetari i PD-së në Gramsh: Ejjjjjjj…Mos ashtu ti, mbaje mend çdo të të punoj unë ty. Polici: Po mirë mo dakord. Kryetari i PD-së në Gramsh: Mbaje mend. As më rruhen le*të. E di ç’je ti për mua? Një këlysh i Fatmir Xhafës. Dhe po të të dojë tr*pi ty, unë s'vij më. Çfarë kam shkelur? Polici: Ju lutem dilni. Kryetari i PD-së në Gramsh: Vetë e kruajte b*thën mo! E di ç’të bëj unë ty
o.j/dita |
Fundi i WikiLeaks, Ekuadori do t’ia dorëzojë Julian Assange Britanisë Posted: 21 Jul 2018 12:47 AM PDT Ekuadori është gati t'i dorëzojë themeluesin e WikiLeaks, Britanisë së Madhe në "javët apo ditët e ardhshme", tha kryeredaktorja e RT, Margarita Simonyan duke cituar burimet e saj. "Burimet e mia tregojnë se Julian Assange do t'i dorëzohet Britanisë në javët apo edhe ditët e ardhshme", shkroi Simonyan në Twitter. "Ashtu si kurrë më parë, unë uroj që burimet e mia të jenë të gabuara", vazhdoi ajo. Mesazhi i Simonyan vjen, pasi spekulimet që Ekuadori është në bisedime me Mbretërinë e Bashkuar për të ardhmen e Assange janë kthyer përsëri në shtypin britanik. Më parë këtë javë, Times raportoi se Britania është e mbyllur në diskutimet e nivelit të lartë me ekuadorianët në një përpjekje për të hequr Assange nga ambasada e tyre në Londër. Sir Alan Duncan, ministri i Jashtëm, thuhet të jetë drejtues i përpjekjeve diplomatike. Burimet e afërta me Assange thanë se ai vetë nuk ishte në dijeni të bisedimeve, por besonte se Amerika po bënte "presion të rëndësishëm" në Ekuador, duke përfshirë kërcënimin për të bllokuar një hua nga Fondi Monetar Ndërkombëtar nëse ai vazhdon të qëndrojë në ambasadë. Raporti i Times vjen vetëm disa javë përpara një vizite në Mbretërinë e Bashkuar nga presidenti i sapozgjedhur i Ekuadorit Lenin Moreno, i cili e ka quajtur Assange një "haker", një "problem të trashëguar" dhe një "gur nën këpucë". Ka pasur shenja të tjera shqetësuese që tregojnë se Assange po bëhet vazhdimisht një ngatërrestar për Ekuadorin. Në fund të marsit të këtij viti, qeveria ekuadoriane ka pezulluar privilegjet e komunikimit të Assange me botën e jashtme, duke prerë lidhjen e tij me internetin në ambasadë. Assange është strehuar në ambasadën e Ekuadorit që nga viti 2012, kur ai kërkoi nga shteti i Amerikës Latine azil. 47-vjeçari kërkohet nga Suedia për akuzat për sulme seksuale, por i frikësohet ekstradimit që mund ta çonte në SHBA. SHBA ka thënë se Assange është "i angazhuar në terrorizëm", me prokurorin e përgjithshëm, Jeff Sessions, vitin e kaluar që e quajti arrestimin e tij si një "prioritet". Gjatë viteve, WikiLeaks ka publikuar qindra mijëra dosje të klasifikuara të SHBA, përfshirë kabllogramet për Luftën e Irakut. Pavarësisht nga hetimi suedez kundër tij, të mbyllur në maj të vitit të kaluar, gazetari australian ende nuk ishte në gjendje të largohej nga ambasada për shkak të një urdhër-arresti të jashtëzakonshëm britanik për shkelje të kushteve të lirimit me kusht. o.j/dita |
Këputja nga vapa dhe goditja nga dielli, shenjat si t’i dalloni Posted: 21 Jul 2018 12:33 AM PDT Pranvera Kola – Dita E ndërsa sinoptikanët lajmërojnë një tjetër rritje temperaturash, veçanërisht gjatë dy ditëve në vijim, bluzat e bardha të shëndetit publik bëjnë thirrje që të tregohet kujdes ndaj ekspozimit në diell dhe temperaturat e larta. Sipas tyre, ditët e fundit është shtuar ndjeshëm numri i pacientëve të vegjël dhe moshave të treta të paraqitura në urgjencat e spitaleve me ndërlikime të shpeshta shëndetësore të shkaktuara nga i nxehti. "Goditjet nga i nxehti ndikojnë në keqësimin e gjendjes psikologjike, pakësim të djersitjes, neveri dhe të përziera, skuqje të lëkurës, frymëmarrje të shpejtë dhe të vështirësuar, rrahje të shpejta zemre, si dhe shfaqjen e dhimbjeve të papritura të kokës", sqarojnë ekspertët e Institutit të Shëndetit Publik. Dy ndër gjendjet prej të cilave duhet të ruheni më shumë janë këputja nga vapa dhe goditja nga dielli. Kjo e fundit në çdo rast përbën edhe një urgjencë mjekësore, për të cilën me patjetër duhet të kërkoni ndihmën e menjëhershme mjekësore. Shenjat dalluese Ndërlikimet në shëndet të shkaktuara nga i nxehti nisin me shfaqjen e shenjave të para të këputjes nga vapa. Referuar kësaj gjendjeje, bluzat e bardha thonë se duhet të dyshoni për mbilodhje nga vapa, në rast trupi juaj fillon tё ndiejë vapën në rritje. Shqetësimet vijojnë me shtimin e djersitjes masive, si dhe rritjes së temperaturës së trupit. Duhet të jeni të kujdesshëm në rastet kur filloni të ndjeni se frymëmarrja juaj bëhet më e shpejtë dhe vështirë, kur keni lëkurë të lagësht në prekje, vuani nga marrje mendsh. Po ashtu goja është e thatë, keni këputje, dhimbje koke, zbehje të ngjyrës së lëkurës të përziera, pulsi është i dobët dhe i shpejtë, lëkura në prekje është e lagësht dhe e ftohtë, si dhe ndjeni të vjella të papritura. enja të mbilodhje, këputje dhe të vjella. "Nëse keni apo shikoni një nga këto shenja të përmendura më lart, largohuni menjëherë nga ekspozimi në diell, apo ambientet që janë të nxehta. Personi i cili shfaq simptomat e përmendura, duhet t'i jepen të pijë shumë lëngje të ftohta dhe t'i fshihen djersët me një peshqir, apo bluzë pambuku. Nëse nuk shihni përmirësim të shpejtë pas kësaj duhet të thërrisni ndihmën mjekësore", sqarojnë ekspertët e shëndetit publik. Në rast se këputja nga vapa nuk trajtohet në kohë, ju rrezikoni që të përballeni me shenjat e gjendjes tjetër që njihet ndryshe si goditja nga dielli, e cila mund të shoqërohet edhe me pasoja të rënda për jetën. Shenjat dalluese të goditjes nga dielli janë: "Marrje mendsh, temperaturë e lartë e trupit (mbi 39 gradё celsius), dhimbje koke, mungesë djersitjeje, të përziera, pulsi është i shpejtë dhe i fortë, lëkura e kuqe e skuqur, e cila bëhet e nxehtë dhe e thatë (në të prekur). "Duhet të bëni shumë kujdes në këto raste, pasi goditja nga dielli gjithmonë kërkon vëmendje nga mjeku. Nëse ju shikoni një nga shenjat e mësipërme, largojeni personin nga ekspozimi i mëtejshëm në të nxehtë dhe dërgojeni në qendrën më të afërt shëndetësore, apo telefonojini urgjencës", vënë në dukje ekspertët e shëndetit publik. Kategoritë e rriskuara Sikundër e theksuam edhe më lar, të moshuarit, e veçanërisht ata që vuajnë nga sëmundjet kronike janë ndër kategoritë më të rrezikuara për t'u përballuar me ndërlikimet e vapës. Por nuk mbeten pas as fëmijët apo kategoritë e tjera të pacientëve. Si masa parandaluese për të moshuarit këshillohet që: "Mjediset e brendshme të banesës të mbahen në një temperaturë konstante rreth 26°, duhet që të moshuarit të mos dalin nga shtëpia nga ora 11:00-18:00. Gjatë gjithë kohës të konsumojnë lëngje jo shumë të ftohta, si dhe të vishen me veshje me ngjyra të hapura prej lini ose pambuku". Disa këshilla për një ushqim sa më të sigurt gjatë verës Duke qenë se gjatë stinës së verës mikrobet rriten shpejt, ndaj kujdes maksimal duhet të tregohet edhe ndaj ushqimeve që konsumojmë, në mënyrë që të shmangim sëmundje të ndryshme. Kjo veçanërisht në drejtim të higjienës. Për të parandaluar këto sëmundje, së pari duhet që të mbani sa më të pastër ushqimin. Higjiena nuk ka të bëjë vetëm me larjen e mirë të produkteve që do konsumoni, por edhe të duarve sa herë që merreni me gatimin e tyre. Së dyti duhet të dini se mishin e marinuar kur e nxirrni nga frigoriferi duhet që ta gatuani menjëherë. Po ashtu edhe enët në të cilat përgatitet mishi duhet të jenë sa më të pastra dhe lara me kujdes para përdorimit. Gatuajeni mishin plotësisht. Këshillohet që të përdorni një termometër për të përcaktuar kohën kur mishi ka arritur temperaturën e duhur të gatimit. Për mishin e pulës dhe llojeve të tjera të shpendëve kjo temperaturë arrihet në 75 gradë, për hamburgerët dhe qoftet temperatura duhet të jetë 72 gradë, ndërsa për peshkun dhe llojet e tjera të mishit temperatura e gatimit duhet të arrijë deri në 63 gradë. Po ashtu duhet të bëni kujdes që të mos e lini ushqimin jashtë frigoriferit për më shumë se sa 1, ose dy orë. Shenjat e këputjes nga vapa janë: Frymëmarrja është e shpejtë dhe e dobët Marrje mendsh Goja është e thatë, keni djersitje të tepërt Këputje dhe dhimbje koke Zbehje e ngjyrës së lëkurës Pulsi është i shpejtë dhe i dobët Lëkura në prekje është e lagësht dhe e ftohtë Mbilodhje, të vjella, si dhe të përziera
Shenjat e goditjes nga dielli janë: Marrje mendsh Temperaturë e lartë e trupit (mbi 39 gradë celsius) Dhimbje koke Mungesë djersitje. Tё përziera Pulsi i shpejtë dhe i fortë Lëkurë e kuqe e skuqur e cila është e nxehtë dhe e thatë (në të prekur). Debulesë e fortë trupore ISHP: Disa rregulla që ndihmojnë për të mbrojtur shëndetin e të rinjve:
Këshilla si duhet të mbrohen moshat mbi 65 vjeç
|
You are subscribed to email updates from Gazeta Dita. To stop receiving these emails, you may unsubscribe now. | Email delivery powered by Google |
Google, 1600 Amphitheatre Parkway, Mountain View, CA 94043, United States |
Lexo edhe: