Ora News: “Heidi Klum puthje pasionante me të dashurin pas performancës” plus 9 more

---

• Heidi Klum puthje pasionante me të dashurin pas performancës
• Lojtari i arteve luftarake poshtërohet nga nëna e tij pas humbjes
• Loja e “Balenës Blu”, 15 vjeçarja hidhet në lumin e rrëmbyer e të turbullt
• NATO nis stërvitjen me shkallë të gjerë në vendet baltike pranë Rusisë
• Kadri Veseli: Kosova dhe Shqipëria do të bashkohen
• Motoçikleta me dy të rinj përplaset nga mjeti, vdes 25 vjeçari
• Bienalja e Mesdheut, një bashkësi të rinjsh kundër antagonizmave në rajon
• Komuniteti Mysliman shtron iftarin e parë të Ramazanit
• Fushata e PD, Abilekaj: Basha do merret me shpenzimet luksoze të Ramës
• Rama për Patozin: Burrë i mençur po naiv, s’kuptoi si funksionon Basha

Heidi Klum puthje pasionante me të dashurin pas performancës Posted: 27 May 2017 11:36 PM PDT Pas divorcit nga muzikanti Seal në vitin 2014, bukuroshja Heidi Klum ka qenë në qendër të vëmendjes së mediave rozë për lidhjen  me të dashurin e saj 13 vite më të vogël. 43-vjeçarja nuk i ka fshehur asnjëherë ndjenjat ndaj Vito Schnabel dhe kanë shkëmbyer një puthje pasionante në publik pas performancës së saj të mrekulleshme në PDA në Oberhausen të Gjermanisë, raporton Daily Mail. Supermodelja dukej mahnitëse me pamjen e saj dhe ka arritur të tërheqë vëmendjen e të gjithëve në skenë. /oranews.tv/ Të parët për lajmin e fundit. Ndiqni Oranews.tv në Facebook dhe në Twitter

Lojtari i arteve luftarake poshtërohet nga nëna e tij pas humbjes Posted: 27 May 2017 11:33 PM PDT Një lojtar i arteve parciale pësoi poshtërim të dyfishtë. Pasi humbi ndeshjen keqas me kundërshtarin, lojtari rus Viktor Kichigin është goditur me shpullë nga nëna e tij e zemëruar, Anna Azovskaya, e cila është menaxherja e tij. Ajo ka futur të tre djemtë në artet luftarake. Viktor, 22 vjeç, humbi keqas ndaj kundërshtarit Ruslan Yamanbae në Jekaterinburg të Rusisë.  Fundi brutal i konkursit e gjeti atë pothuajse të mbytur në gjak nga kundërshtari dhe përfundoi i shtrirë në tokë. Gjatë gjithë betejës, nëna e tij shihej duke bërtitur vazhdimisht "ngrihu, ngrihu". Pas disfatës dërrmuese, nëna shihet duke u kujdesur për plagët e Viktorit dhe më pas fillon të bërtasë dhe e godet në fytyrë. Viktor e la rrjetën dhe u largua para se rezultati të shpallej zyrtarisht. Nëna e tij, e cila e ka trajnuar gjithashtu Viktorin dhe djemtë e tjerë që të luftojnë në artet parciale, është bërë e famshme për shkak të veprimeve të saj. /Ora News.tv/   Të parët për lajmin e fundit. Ndiqni Oranews.tv në Facebook dhe në Twitter

Loja e “Balenës Blu”, 15 vjeçarja hidhet në lumin e rrëmbyer e të turbullt Posted: 27 May 2017 10:53 PM PDT Tre të rinj në jug të Rusisë rrezikuan jetën e tyre për të shpëtuar një vajzë 15 vjeçare, e cila u hodh në një lumë të trazuar malor, si pjesë e lojës së diskutueshme në mediat sociale e quajtur "Balena Blu", që çon shpesh të rinjtë në vetëvrasje. Incidenti dramatik ndodhi të shtunën në Republikën e Kabardino-Balkaria në Kaukazin rus. Videoja tregon skenën kur tre shokët filmojnë vajzën duke zbritur drejt lumit dhe më pas bërtasin: Stop. Qëndro drejt atje. Prit". Vajza injoroi thirrjet e tyre dhe hyri në lumë. Tre adoleshentët e ndoqën vajzën në lumin e rrezikshëm dhe mundën ta nxjerrin në breg. Ajo më vonë u tha shpëtimtarëve të saj se po performonte sfidën e lojës së "Balenës Blu", e lidhur me një varg vetëvrasjes në Rusi dhe vende të tjera. Kur e pyetën nëse ishte në dijeni se veprimet e saj do ta çonin drejt vdekjen, vajza u përgjigj qetësisht "po" dhe qeshi. Ajo tha se ishte përfshirë në lojë për shkak se ajo është "cool" dhe "adrenalinë". Vajza u ekzaminua nga një ekuipazh i ambulancës dhe policia në Kabardino-Balkaria ka nisur hetimet mbi incidentin. Një vajzë 12 vjeçare u arrit të shpëtohej në qytetin Karbulak në muajin maj. Të paktën 120 adoleshentë në Rusi dyshohet se janë vetëvrarë pikërisht për shkak të lojës. Adoleshentëve u është thënë të dërgojnë video dhe foto si dëshmi se ata kanë kryer detyrat e tyre. /Ora News.tv/   Të parët për lajmin e fundit. Ndiqni Oranews.tv në Facebook dhe në Twitter

NATO nis stërvitjen me shkallë të gjerë në vendet baltike pranë Rusisë Posted: 27 May 2017 10:39 PM PDT Ndërsa shtetet baltike në bashkëpunim me NATO-n kanë përfunduar ciklin e ushtrimeve të mëparshme ushtarake afër kufijve rusë, Aleanca ka nisur të ashtuquajturat stërvitje "Sabre Strike 17" me vende si Estonia, Letonia, Lituania dhe Polonia. Udhëheqësit e bllokut ushtarak të NATO-s kanë rënë dakord të vendosin katër batalione shumëkombëshe në Poloni, si dhe në Estoni, Lituani dhe Letoni në korrik të vitit të kaluar, me qëllimin për të penguar “agresionin potencial rus”. Tani, të katër grupet e reja të luftës do të marrin pjesë në stërvitjet katërjavore (28 maj-24 qershor), për të forcuar bashkëpunimin midis ushtrisë së Shteteve të Bashkuara dhe 19 shteteve të tjera që marrin pjesë në stërvitje. “Objektivi kryesor i stërvitjes do të jetë trajnimi dhe ushtrimi i Grupeve të Betejës të Prezencës së Forcave të Përparuara të NATO-s (EFP) me fokus në nxitjen e ndërveprueshmërisë me aleatët dhe partnerët rajonalë dhe përmirësimin e aftësive të përbashkëta operacionale në misione të ndryshme”, tha ushtria amerikane në një deklaratë . Stërvitja në shkallë të gjerë do të përfshijë stërvitjet e sulmit në amfibë në Letoni, ushtrime të gjalla të zjarrit në Poloni dhe Lituani dhe një sulm ajror i shoqëruar me një kalim lumi nga marinsat Mbretërorë Britanikë në kufirin Poloni-Lituani. Në Poloni të premten, grupi luftarak ndërkombëtar i NATO-s mbaroi stërvitjet ‘Puma 17’ pranë qytetit verilindor të Orzysz. Rreth 2,500 trupa, përfshirë një batalion të NATO-s, morën pjesë në stërvitjet ushtarake që praktikuan përfshirjen në një skenar të ashtuquajtur “luftë hibride” për të penguar kërcënimin gjithëpërfshirës të Rusisë. Skuadrat e ushtarëve të NATO-s kryen stërvitje duke përdorur tanke polake PT-91, automjete luftarake BMP-1, modele amerikane të transportuesve të personelit të blinduar të Stryker dhe helikopterë ushtarak rus Mi-24. Ky ishte stërvitja e parë e përbashkët me batalionin shumëkombësh të NATO-s i cili mbërriti në Orzysz në pranverë. /Ora News.tv/   Të parët për lajmin e fundit. Ndiqni Oranews.tv në Facebook dhe në Twitter

Kadri Veseli: Kosova dhe Shqipëria do të bashkohen Posted: 27 May 2017 10:24 PM PDT Gjatë një interviste në "Xing me Ermalin", kreu i kuvendit të Kosovës Kadri Veseli ka folur për Shqipërinë e Madhe dhe alternativën që një ditë Kosova dhe Shqipëria të jetë një shtet i vetëm. Ai është pyetur nga Ermali se si do të ndahen pushtetet nëse kjo ndodh? Veseli është shprehur se Shqipëria dhe Kosova do të bashkohen të dyja në Bashkimin Europian, ndërsa e ka vënë theksin se tashmë të rinjtë janë më pranë njëri-tjetrit. "Fëmijët tanë kanë më shumë komunikim dhe mund të vijnë sa herë të duan, e anasjelltas", ka thënë ai. Më tej, kryetari i Partisë Demokratike të Kosovës ka shpjeguar se të rinjtë duhet të punojnë për një bashkim të shqiptarëve në BE dhe natyrisht për të mirën e kombit tonë.   Të parët për lajmin e fundit. Ndiqni Oranews.tv në Facebook dhe në Twitter

Motoçikleta me dy të rinj përplaset nga mjeti, vdes 25 vjeçari Posted: 27 May 2017 01:50 PM PDT Një 25-vjeçar humbi jetën në spitalin e Lushnjes pasi u përfshi në një aksident rrugor. Viktima L.S, banues në fshatin Kryekuq të Divjakës po udhëtonte si pasagjer në një motoçikletë, kur u përplas nga një tip "Benz", me targa AA 634 BE. Ngjarja u regjistrua rreth orës 20:35 të mbrëmjes në fshatin Mizë. Nga aksidenti mbetën të plagosur drejtuesi i motoçikletës shtetasi M.M 32 vjeç, banues në fshatin Kryekuq dhe pasagjeri në motorçikletë, shtetasi L.S. Ata u dërguan në spitalin e Lushnjes, ku L.S për shkak të plagëve të marra nuk arriti të mbijetojë duke ndërruar jetë. Policia ka shoqëruar drejtuesin e mjetit, shtetasin A.P dhe po kryhen veprimet proceduriale. Grupi hetimor ndodhet në vendngjarje dhe po punon për zbardhjen e shkaqeve të këtij aksidenti. /Oranews.tv/ Të parët për lajmin e fundit. Ndiqni Oranews.tv në Facebook dhe në Twitter

Bienalja e Mesdheut, një bashkësi të rinjsh kundër antagonizmave në rajon Posted: 27 May 2017 01:37 PM PDT Maja Ćirić: Jemi në ish-Amabasadën Jugosllave që sigurisht është një simbol i veçantë. Unë jam këtu për të përfaqësuar si kuratore e arteve vizuale 80 artistë të Bienales së Mesdheut dhe Evropës për të rinjtë. Ish-Ambasadën Jugosllave unë do ta quaja një simbol, një metaforë për të gjithë utopitë e humbura. Ish-Jugosllavia është tani një vend transnacional  edhe këtu në sajë të artistëve nga vende të ndryshme kemi përdorur artin për të krijuar hapësirën e një menataliteti të ri, një hapësire të re politike, pra një hapësirë e re transnacionale." Gazetarja: Tema e kësaj bienaleje është shtëpia. Çfarë lidhjesh ka ky koncept që unë e kam parë të interpretuar në dhjetra variacione nga artistë pjesëmarrës, pikërisht me utopitë e humbur që përmende pak më parë?! Maja Ćirić: Teorikisht utopia është diçka e paarritshme, mund të shkojmë drejt saj pa e prekur dot kurrë atë pikën e mbërritjes. Gjithsesi utopia ka të mirën që na vë në lëvizje. Unë shoh se artistët e këtij brezi janë shumë të ndjeshëm ndaj temës së shtëpisë. Ndjeshmëri që duket tek vëmendja, dhe vetëdija që shprehin për traditat, vendet dhe origjinat nga vijnë. Madje do të thosha se janë shumë më të ndjeshëm se brezat paraardhës. Gazetarja: Sa të influencuar mund të jenë këta artistë nga fenomeni i emigracionit, sepse jemi sërish në kërkim të një shtëpie të këtyre miliona njerëzve? Maja Ćirić: Konkretisht grupi Faxen, një grup artistësh austriak ka realizuar një radio e cila është në gjendje të kapë të gjitha frekuencat e programeve radiofonike të shqiptarëve që jetojnë në diasporë. Kjo radio vërtitet në mesin e këtyre frekuencave të humbura. Në fakt nuk janë shumë punët që merren me emigracionin, me krizën e emigrantëve në rajonin e Mesdheut, nuk e shoh si gjë të keqe. Si kuratore e nisur edhe nga një pozicion politik mendoj se gjendja e emigrantëve sot nuk duhet përdoret si një mënyrë artistike sepse është një problem shumë delikat për Mesdheun. Do t'iu përmendja një video të Daniele Costas në Muzeun Historik Kombëtar që flet për një djalosh emigrant që jeton aktualisht në Venecia dhe është më së shumti një punë poetike. Është e lehtë të rendësh pas krizave të emigracionit në Mesdhe dhe të krijosh art me to. Mjaft artistë me gjithë moshën e re janë treguar të matur për të mos krijuar qasje abuzive me këto probleme serioze.  Për mua si kuratore arti nuk duhet paqyruar por duhet të ndërhyjë, të ndërveprojë. Ish-Ambasada Jugosllave ka qenë e mbyllur, ne bëmë një ndërhyrje, hapëm një derë të mbyllur. Në këtë kuptim arti nuk duhet të përdorë atë që ekziston tashmë por të krijojë mundësi të reja. Gazetarja: Maja e ke mbajtur parasysh që punët që do të ekspozoheshin këtu duhet ti përshateshin nga ana formale një mënyre të veçantë, duke pasur parasysh rëndësinë që ky objekt mund të ketë për historinë midis dy vendeve tona? Maja Ćirić:  Në këtë ndërtesë ndodhet ekspozita kryesore e Bienales dhe dy projekte bashkëpunuese. Njëri prej tyre ndodhet pikërisht në këtë kat me titull 'Një pesazh krijon një hapësirë mendore". Pastaj është projekti që lidhet drejpërdrejtë me ish-Jugosllavinë, quhet 'Motel Trogier' i krijuar me pjesëmarrjen e shumë artistë të frymëzuar nga 'Motel Trogier' një lloj arkitekture moderniste në Kroaci. Dhe këtu dalin shumë marrëdhënie të paparashikuara, diçka që arti bashkëkohor duhet ta krijojë. Unë besoj se me këtë ekspozitë ia kemi dalë që nga këndvështrime të ndryshme të krijojmë marrëdhënie të paparashikuara, qoftë për të nxitur qytetarët e Tiranës për të hyrë në këtë ndërtesë dhe të shohin të reflektuar temën e Mesdheut. Nuk është fjala për Mesdheun si rajon por për të gjithë antagonizmat që ekzistojnë në Mesdhe dhe bëhen antagonizma globale. Ne kërkojmë atë që nga një këndvështrim psikoanalitik është Mesdheu mes nesh, brenda nesh. Edhe atëherë kur ky det nuk na lag armiqësitë mes veriut dhe jugut të Mesdheut vazhdojnë të kenë fuqi brenda nesh. Gazetarja: Është brezi i lindur pas rënies së murit të Berlinit, është brezi që është lindur pas rënies së komunizmit në të gjithë Evropën e Lindjes. Si reflektohen shenja të kësaj epoke në veprat e tyre, nëse reflektohen? P.sh, kam parë punë të artistëve shqiptarë si Iva Lulashi, Jonida Laçi dy vajza të cilat e reflektojnë komunzimin në një mënyrë a në një tjetër. Maja Ćirić: Iva Lulashi flet me serinë e pikturave në vaj erotiko-komunizmi që ndodhen në Galerinë Kombëtare  të Arteve. Nga ana tjetër Jonida Laçi flet me videon për hotel Vollgën në Durrës. Të dyja këta artiste bëjnë një zbërthim të narrativave historike. Ato krijojnë një zonë të dukshme që për mua si kuratore ka vlerën e artit. Arti duhet të krijojë zonat e reja të dukshme. Iva Lulashi ekspozon në Galerinë Kombëtare ku ndodhen të gjitha tablot e bukura të realizmit socialit të cilat e mungon ai këndvështrimi i censuruar, ai aspekti i penguar i erotikës në komunizëm. Iva e demostron me pikturat e saj të vogla nga filmat e kohës së socializmit dhe i zbërthen historitë me mjaft ndjeshmëri. Një artist tjetër shqiptar që ekspozon për herë të parë punët e tij në Shqipëri është Vangjush Vëllahu i cili përdor sërish metodën e dekonstruksionit. Ai udhëton në Azinë Qendrore në Kaukaz dhe bën një kërkim të mrekullueshëm mbi arkitekturën socialiste të braktisur. Ky shqiptar që jeton në Berlin është një zbulim për bienalen tonë. Videot e tij janë ekspozuar në Muzeun Kombëtar. Gazetare: Maja ti shpreh besimin tënd që ky brez artistësh por edhe një brez qytetarësh që mendon për një të ardhme më të mirë dhe mund ta bëjë realitet këtë gjë. Cilat janë paragjykimet që ekzistojnë mbi artistët bashkëkohorë sot. Maja Ćirić: Për mua është hera e parë që shoh dukshëm artistë kaq të vëmendshëm ndaj historisë, jo për të marrë forcë nga historia dhe nga narrativat e saj të konsoliduara tashmë. Ata nuk merren me stereotipet. Kjo më pëlqen sepse tregon se aktorët e rinj janë të vetëdijshëm për nevojën e të qenit fleksibël në një botë pa ekuilibër. Dhe në këtë kuptim, ajo që më pëlqen në Shqipëri është prania e vlerave tradicionale. Në këtë bienale shihet një përzierje e bukur mes tradites dhe bashkëkohores. Ballkani ka qenë gjithnjë i rrezikuar nga ekzotizmi. Shpresoj që me prezantimin e artistëve në bienalen e mesdheut të mos kemi lejuar këtë mënyrë të pari nga një pjesë e botës. Madje them se ne kemi luajtur me këtë ide. Unë kam kuruar dy herë pavijonin e Serbisë në bienalen e Venecias në 2007 dhe 2013. Në vitin 2013, titulli ishte "Nuk ka asgjë mes nesh" si një shaka. Përpiqem të kuptoj pozitën e atyre vendeve që perëndimi i sheh si ekzotike. Mendoj se në këtë bienale kemi krijuar një bashkësi të re, cka duhet të jetë edhe roli i një bienaleje si kjo për të integruar artistë me këndvështrime të ndryshme si ata që vijnë nga: Austria, Maroku për tu takuar në një kontekst të ngashëm, jo të ndryshëm. U duhet kushtuar vëmendje këtyre artistëve sepse së paku 15 prej tyre do të jenë në skenën botërore të artit bashkëkohor në të ardhmen. Te kjo sallë ka 2-3 vepra që e konceptojnë zërin si një hapësirë mendore. Them se kjo bienale ka sjellë një ndryshim në të menduarit e veprës së artit, por pa e braktisur traditën, kjo ka rëndësi. Prandaj për artistët dhe kuratorët është një histori e bukur kjo që Tirana e krijoi në sajë të bienales dhe drejtorit të saj artistik. /oranews.tv/ Të parët për lajmin e fundit. Ndiqni Oranews.tv në Facebook dhe në Twitter

Komuniteti Mysliman shtron iftarin e parë të Ramazanit Posted: 27 May 2017 01:23 PM PDT Komuniteti Mysliman i Shqipërisë ka shtruar mbremjen e se shtunes iftarin e parë të Ramazanit, traditë që ndiqet çdo vit në muajin e shenjtë të besimtarëve myslimanë. Në darkë krahas besimtarëve te shumte ishin të ftuar përfaqësues të trupit diplomatik, politikës, medias dhe biznesit. Kryetari i Komunitetit Mysliman, Skënder Buçaj, falenderoi dhe uroi të gjithë të pranishmit. Gjate ketij muaji besimtaret mysliman agjerojnë nje muaj  muaj ku shpirti triumfon mbi trupin.  /Oranews.tv/   Të parët për lajmin e fundit. Ndiqni Oranews.tv në Facebook dhe në Twitter

Fushata e PD, Abilekaj: Basha do merret me shpenzimet luksoze të Ramës Posted: 27 May 2017 01:08 PM PDT Duke analizuar fjalimin e kreut të PD-së në hapjen zyrtare të fushatës elektorale, analisti Enton Abilekaj  thotë se Basha do të përqëndrojë fushatën e tij tek shpenzimet luksoze të Kryeministrit. Sloganin e PD për fushatën e sheh të ndërlidhur me temën e emigracionit. Në studion e Ora News, Abilekaj shprehu rezerva për listën e kandidatëve për deputetë të PD. Sipas tij Basha përjashtoi zërat kundër dhe me peshë në PD, duke i zëvendësuar me njerëz të panjohur dhe pas asnjë kontribut në këtë parti. Fjalimi i Bashës-Ishte një program për Republikën e re, që është pagëzuar tashmë fushata e PD që në çadër.Nuk kishte shumë të reja, ato premtime i ka trajtuar në ditë të veçanta gjatë kohës që ishte në çadër. Periudha e çadrës, përveç protestës për zgjedhje të lira, shërbeu edhe për të prezantuar programin e PD.Pikat ku bazohet Basha tek ulja e taksave, të rinjtë, abrogimi i ligjit të arsimit të lartë me të cilin po luan dhe LSI.Kemi një retorikë që trashëgohet nga vitet e kaluara.E reja është që LSI i është bashkuar.Programi do të detajohet më shumë në ditët e ardhshme. Ajo që zuri më shumë peshë tek fjalimi i zotit Basha ishte sulmi ndaj qeverisë, shpenzimet e tepërta të qeverisë, gjeti kohën të merret me palmat që kanë mbushur rrugët dhe autostradat e vendit, që në fakt kanë kushtuar shumë dhe tashmë kanë dalë jashtë funksionit.Nuk u përdor pa qëllim tema e palmave. Basha do të merret kryesisht me shpenzimet lukzose të Kryeministrit gjatë fushatës duke tentuar të nxjerrë sesi rritja e varfërisë nuk e ka shqetësuar Kryeministrin të bëjë shpenzime për fasadat, zbukurimet të cilat janë të dështuara dhe nuk mund të mirëmbahen. Slogani i fushatës-E nesërmja e sigurt buron nga ekonomia e fortë, slogani është ndërtuar si një përgjigje ndaj emigrimit. Largimi masiv i njerëzve për shkak të pasigurisë në këtë vend, ndërtimi i së ardhmes. Duke thënë ekonomi e fortë e nesërme e sigurt, domethënë që nuk ka pse të ketë emigracion, që e ardhmja të ndërtohet në Shqipëri.  Të përjashtuarit nga listat- Lista në përgjithësi ishte një tregues i mungesës së koherencës së Bashës. Kemi një lider që deri në 17 maj deklarohej për një republikë të re, zgjedhje të lira, respektim të mendimit kundër brenda partisë, deklarohej për dekriminalizimin. Sot me listën që kemi, përveç se Basha me marrëveshjen e 17 majit hoqi dorë nga zgjedhjet e lira dhe shkuarja deri në fund të një projekti që do u krijonte të gjithëve mundësinë të futeshin pa probleme, monopolizoi me PS kontrollin e zgjedhjeve, bëri një marrëveshje kundër të gjithëve.Me listat që pamë ai goditi mendimin ndryshe, figura si Topalli, Bregu, Patozi, Selami, të cilat ishin figura që jo vetëm mendonin ndryshe por shpesh mendimi i tyre përputhej me qëndrimet ndërkombëtare që këshillonin dhe paralajmëronin herë pas here PD. Ata nuk kishin probleme me emrin e kryetarit, por idetë, mënyrën si i qasej PD zhvillimeve në vend. Mendoj që ata janë larguar vetëm sepse nuk mendonin si kryetari, për asnjë arsye tjetër. Janë larguar disa ish-Ministra të konsumuar, dikur do të duhet të iknin nga politika. Topalli edhe mund të ishte larguar pas 20 vjet në politikë dhe pse nuk është e konsumuar, por nuk mund të ikte me një vendim natën. Merrem me largimin e tre figurave të tjera, Patozi, Bregu, Selami, që janë figura jo vetëm të pakonsumuara por nga figurat më pozitive dhe më elektorale që ka PD. Ekipi i ri- Nuk mund të lindë nga asgjë, duhet të lindë nga sallat e kuvendit, foltoret, debatet publike. Nëse do kishim zëvendësim me njerëz që janë shquar në debatet publike në ide, rezistencë sociale dhe civile ndaj qeverisë mund të quhej e justifikueshme.Por zëvendësimi me njerëz krejt të panjohur, pa asnjë lloj kontributi në PD, njerëz të cilët PD i krijoi si figura publike përmes foltoreve dhe reklamave duke imituar formën e opozitës së Edi Ramës. Zëvendësimi me këto figura nuk është fare e justifikueshme. /Oranews.tv/   Të parët për lajmin e fundit. Ndiqni Oranews.tv në Facebook dhe në Twitter

Rama për Patozin: Burrë i mençur po naiv, s’kuptoi si funksionon Basha Posted: 27 May 2017 12:41 PM PDT Kryeministri Edi Rama përmes një shënimi në fb, i është përgjigjur Astrit Patozit për parashikimin që ai kishte bërë në seancën e fundit për mbetjen e deputetit  jashtë listave të PD. Ai thotë se është nga të vetmit që nuk është habitur me skuadrën që ka lëshuar në fushë kundërshtari i tij politik Lulzim Basha. Rama thotë se i vjen keq që Astrit Patozi, po mesa duket jo vetëm ai, nuk kishin kuptuar në gjithë këto vite natyrën e liderit të tyre dhe raportin e Bashës me skuadrën.  'M’u dhimbs vërtet, burrë i mençur po naiv, që ende, as sot, s’e kupton sa thjeshtë funksionon Lulëzim Basha; kryetari që nuk fiton dhe nuk humbet kurrë, sepse kurrë nuk bën dot një betejë'. Kryeministri shton më tej "Gjynah Astriti, kaq vite në fushën e betejës, s’e ka marrë vesh akoma pse fëmijët i prishin pa asnjë gajle lodrat e tyre, njësoj siç trashëgimtarët e gabuar të froneve rrënojnë mbretëritë, pa e humbur gjerësinë e buzëqeshjes as ditën kur mbyllin sytë përgjithmonë". Postimi i plotë në fb Një replikë pa polemikë me Astrit Patozin Shoh një habi të madhe rretherrotull me skuadrën që Lulëzim Basha nxorri në fushë. Mesa kuptoj jam ndër shumë të rrallët që s’jam habitur dhe thjesht habitem pse habiten të tjerët. Dikush më tha, “Kjo ishte njësoj si De Biazi të futej kundër Spanjës, me portierin e tretë, me 3 mbrojtësa të vrarë, me mesfushën me 3 goca volejbolliste plus Loro Boriçin (dmth Saliun), në sulm bjeri t’i biem dhe pa stol rezervash… Sala se bënte kurrë këtë skuadër!”. “Po çfarë lidhje ka, i thashë, Luli nuk është as De Biazi, as Saliu, që me njëri-tjetrin e kanë një gjë të përbashkët: E ndjejnë shumë kohë përpara ndeshjes, erën e gjakut të fushës së betejës!” Lulëzim Basha nuk ka fituar asnjë betejë e nuk ka humbur asnjë betejë po ashtu, sepse në fakt, nuk ka bërë dhe nuk bën dot beteja. I mjafton t’i quajë humbjet fitore, t’i festojë me buzën vesh më vesh dhe pastaj t’ia fusë gjumit i lehtësuar që iku edhe një kokëçarje tjetër! Ai i gëzohet pushtetit si një fëmijë lodrës që i dhurojnë, po nuk i pëlqen hiç asfare puna që i kanë dhënë bashkë me pushtetin. Eshtë si ata trashëgimtarët e gabuar të froneve që i çonin mbretëritë në rrënim, duke shijuar deri në fund jetën në oazin e oborrit. E do pushtetin si fëmija që qan e i bie këmbës, për një lodër në vitrinën e një dyqani. Po s’është në gjendje ta vrasë fort mendjen asnjë minutë, se si të administrojë dhe fuqizojë kapitalin politik e njerëzor të skuadrës së tij. E njësoj si fëmija, që të gjuan me shqelm kur i thua boll qave apo kur nuk i’a var të qarave të tij, ai e sheh skuadrën si burimin e dhimbjeve të kokës që duhet fikur, jo si burimin e fuqisë së vet që duhet rritur. Kështu që më erdhi sinqerisht keq që Astrit Patozi, po mesa duket jo vetëm ai, as kaq s’kishin kuptuar gjithë këto vite nga natyra e liderit të tyre dhe raporti i tij me skuadrën. Po jo vetëm kaq. Astriti mbante mend që i thashë në replikën time të fundit me të në Kuvend (meqë ra fjala, ishte ndër fare të paktët që ma vinte trurin në lëvizje kur më sulmonte) nuk e di a do jesh në parlamentin e ri(?). Dhe aludonte se ndoshta, kushedi, unë kur i’a thashë atë që do t’i ndodhte, dija gjësend për fatin e tij nga bisedat e mia me Lulin për Marrëveshjen Politike! M’u dhimbs vërtet, burrë i mençur po naiv, që ende, as sot, s’e kupton sa thjeshtë funksionon Lulëzim Basha; kryetari që nuk fiton dhe nuk humbet kurrë, sepse kurrë nuk bën dot një betejë. Gjynah Astriti, kaq vite në fushën e betejës, s’e ka marrë vesh akoma pse fëmijët i prishin pa asnjë gajle lodrat e tyre, njësoj siç trashëgimtarët e gabuar të froneve rrënojnë mbretëritë, pa e humbur gjerësinë e buzëqeshjes as ditën kur mbyllin sytë përgjithmonë. /Oranews.tv/ Të parët për lajmin e fundit. Ndiqni Oranews.tv në Facebook dhe në Twitter

You are subscribed to email updates from Ora News. To stop receiving these emails, you may unsubscribe now.	Email delivery powered by Google
Google Inc., 1600 Amphitheatre Parkway, Mountain View, CA 94043, United States

loading...

Lexo edhe: