Unë nuk shoh njeri që është duke vajtuar përpara apo pranë Zaevit. Thjesht, është kureshtje e natyrshme jo për ta dëgjuar Zaevin, por për t’i dëgjuar ato që është duke i publikuar Zaevi dhe për të dëgjuar prej personave përgjegjës se si është shpërdoruar me buxhetin e shtetit dhe se si shqiptarët e Kumanovës janë porositur të kapen për fyti duke shpresuar në ndihmën e partisë politike shqiptare në pushtet. Është një rast i mirë që tanimë botërisht të dihet se gjyqësia dhe prokuroria është në shërbim të partisë politike maqedonase në pushtet. Në gjithë këtë avlli, nuk mund të kuptohet roli i partisë politike shqiptare në opozitë. Përse ajo pikërisht tani dëshiron të kacafytet me Zaevin? Le t’ia thyej hundët pas kësaj rrjedhe po deshi, por përse pikërisht tani, kur mund të përfitojmë diçka, në mos shumë, një grimcë po, në mos ta gjejmë shpellën e ariut, gjurmët shpresoj se do t’i gjejmë. Fundja a nuk është qëllimi i kësaj partie rrëzimi i këtij pushteti, të cilin disa herë e ka kritikuar shumë ashpër?
Ndoshta edhe pas këtyre bombave ajo nuk do të rrëzohet, porse ekziston gjasa e rrëzimit. Përse të mos e nxisim, përkrahim dhe ujisim këtë gjasë? Përse nuk e ndihmon këtë mundësi rrëzimi? Përse ndihet kaq e pafajshme dhe kaq pa përgjegjësi? Të mos harrojmë se pas pushtetit të dobët nuk ka mundësi të qëndrojë një opozitë e fortë. Në këtë rast, assesi nuk kihet për qëllim barazimi i përgjegjësive të pushtetit dhe opozitës. Përse nuk e sheh të arsyeshme të debatojë më me durim, qetësi dhe pa aludime ndaj atij që nuk mendon si ai, ngaqë populli si rrjedhojë e kësaj sjelljeje aspakt të duhur për një përfaqësues të popullit edhe disa të fajshëm mund t’i sheh si të pafajshëm? Më vjen keq kur shoh se edhe opozita nuk punon si duhet për t’u bërë pjesë e pushtetit, për ta asgjësuar kështu atë që e kritikon derisa është në opozitë. Kur i humbim shpresat edhe prej opozitës, atëherë rroftë anarkia, derisa të dëshmohet një subjekt tjetër politik se vërtetë është e interesuar që ta ndryshojë për mirë gjendjen e shtetit dhe të shqiptarëve në këtë shtet.
loading...
Lexo edhe:
